Hafiz Məmmədov: Şaferin Bakı-ya uğur qazandıracağına inanıram

«Bakı» Futbol Klubunun prezidenti Hafiz Məmmədov bu gün komandasının yeni baş məşqçisinin adını açıqladı. Azerisport.az xəbər verir ki, qarşıdakı ikiildə klubunbaş məşqçi postunu Vinfried Şaferə həvalə edən Hafiz bəy bunun səbəbini klub saytına verdiyi açıqlamada belə izah etdi: «Bakı» klubunun baş məşqçisi postuna bir çox namizədlər var idi. Son bir neçə gündə isə iki mütəxəssis arasında seçim etməli olduq və mən cənab Şaferə üstünlük verdim. Bu seçimin səbəbi odur ki, Şafer çox tanınmış məşqçidi. 1996-cı ildə Almaniyanın, daha sonra Afrikanın ən yaxşı məşqçisi seçilib. Eyni zamanda BƏƏ-də uğur qazanıb. 60 yaşı var, təcrübəlidir. İnanıram ki, Şafer klubumuza da uğur qazandıracaq. Hamı onun təcrübəsindən yeni bir şey öyrənəcək».

 

Hafiz bəy “Bakı” Futbol Klubunun yeni mövsüm üçün transfer siyasəti barədə bunları dedi: «Təbii ki, heyətimizi gücləndirmək fikrindəyik. “Bakı” klubu hər zaman iddialı olub, qarşıdakı mövsüm də istisna təşkil etməyəcək. Yeni mövsümdə həm çempionluq, həm də ölkə kuboku uğrunda yarışacağıq. Bununla belə, cari mövsümdə əsas məqsədimiz avroliqada uğurlu çıxış etməkdir. Bunun üçün də mütləq yeni oyunçular transfer edəcəyik. Ötən mövsüm Jaba kimi səviyyəli oyunçunu heyətimizə qatdıq. Bu mövsümdə də eyni səviyyəli 3-4 futbolçunun transferi barədə düşünürük. Namizdələr var, amma indidən ad açıqlamaq istəmirəm. Tezliklə hər şeyi görəcəksiniz. Transfer çalışmaları barədə yeni baş məşqçimizlə də söhbətimiz oldu. O da bildirdi ki, heyətə qatmaq istədiyi bəzi oyunçular var. Hansılar ki, səviyyələri ilə seçilirlər. Bütün məqsədimiz “Bakı” Futbol Klubunun avropada uğur qazanmasıdır. Avropada Azərbaycan futbolunun adını yüksəltməliyik».