Bəxtiyar SOLTANOV: «Yığmaya çağırılmamağımın səbəbini başa düşmürəm»

«Bakı» futbol klubunun hücumçusu Bəxtiyar Soltanov azerisport.az saytına verdiyi müsahibədə komandasının Avropa Liqasındakı perspektivlərindən, Vinfrid Şeferin təyinatından və Uruqvay komandasına azarkeşliyinin səbəblərindən danışır.

 

«Bakı» Avropa Liqasına hazırlaşır. Komanda bu yarışda nəyə ümid bəsləyə bilər?

«Bakı» ən azı iki mərhələ keçməli, başqa sözlə, ötənilkindən yaxşı nəticə göstərməlidir. Avropa Liqasının qrup mərhələsinə düşmək yaxşı olardı. Komandanın heyətinin əsas hissəsi qorunub saxlanıb, buna görə də, fikirləşirəm ki, qrup mərhələsinə çıxa biləcək gücdəyik. Çox şey püşkatmanın nəticələrindən asılı olacaq.

 

Bu günlərdə komanda yeni məşqçisi ilə tanış olub. Vinfrid Şefer haqqında nə deyə bilərsiniz?

Onunla serbiyalı Bandoviç arasında seçim barədə söhbət gedəndə gizlətmirdim ki, alman mütəxəssisin işə cəlb edilməsinin tərəfdarıyam. Əlbəttə, məşqçinin seçimi mənim işim deyil, sadəcə olaraq, Şeferin malik olduğu təcrübə məni daha çox cəlb edirdi.

 

Qorxmursunuz ki, Şeferin gəlişi ilə əsas heyətdəki yerinizi geri qaytara bilməyəcəksiniz?

Ötən mövsüm tez-tez ehtiyatda qalırdım. Bülent Korkmaz mənə etibar edirdi, Cüneyt Biçer isə ehtiyatda saxlayırdı. Mən oyun təcrübəsini itirmişəm. Lakin Şeferə özümü ən yaxşı tərəfdən göstərməyə çalışacağam.

 

Eyni zamanda, yığma komandada yerinizi itirmisiniz.

Berti Foqts məni Avstriyadakı təlim-məşq toplanışına dəvət etmədi. Bu, onun seçimidir. O ki qaldı gənclərdən ibarət komandaya, bu, mənə doğrudan da aydın deyil. Daha dəqiq desəm, məşqçi Əfqan Talıbovla əlaqə saxlamışam və o, mənə deyib ki, Bernhard Lippertin fikrincə, mən bacardığımın hamısını nümayiş etdirə bilmirəm, məndən daha yaxşı oyun gözləyir.

 

Bu, xətrinizə dəymir ki?

Necə deyim? Bir müddət öncə Lippert deyirdi ki, yığmaya qapıçı Osman Umarovu dəvət etməyəcək, amma bunun əksi oldu.

 

«Bakı»da isə Sizin mövqeyinizi Vyaçeslav Sofroni tutub.

Bəli, o, qol vururdu və onu əsas heyətə daxil edirdilər. Sonra Sofroni zədə aldı, mən yenidən meydanda görünməyə başladım. Lakin oynamayanda da fərdi məşqlər edirdim, formanı itirməməyə çalışırdım.

 

Dünya çempionatında kimə azarkeşlik edirsiniz?

Uruqvaya. Orada Forlan oynayır. Çox istərdim ki, Mundialda o, hər şeyə nail ola bilsin.