«Qalatasaray» - «Fenerbahçe» matçı Bakıda!

Dünyanın ən qədim tarixə və prinsipiallığa malik futbol derbilərindən biri – «Qalatasaray» - «Fenerbahçe» matçı Bakıda keçirilə bilər.

 

Klublar artıq razılığa gələ biliblər. Qürbət Kuboku adlanacaq oyunlar növbə ilə türklərin daha çox yaşadığı ölkələrdə keçirilməlidir. SportToto şirkətinin sponsorluq edəcəyi oyunların birincisi iyulun 21-də Almaniyada baş tutmalıdır. «Cim-Bom»un idman direktoru Adnan Sezginin sözlərinə görə, belə matçlar hər il təşkil olunacaq. Yoxlama xarakteri daşısalar da, bu oyunlarda qarşıdurmanın prinsipiallığı açıq-aydın seziləcək.

 

Hər bir komanda həmin oyunlardan 1 milyon türk lirəsi (500 min manat) qazanacaq. Oyunların keçiriləcəyi stadionlar ən azı 50 min tamaşaçı tutmalı, biletlər isə minimum 30 avroya satılmalıdır.

 

Komandalar İsveçrədə, Fransada, ABŞ-da, Belçikada və Azərbaycanda qarşı-qarşıya gəlməyi nəzərdə tuturlar. Nəzərə alsaq ki, «Tofiq Bəhramov» stadionu daha az tamaşaçı tutumuna malikdir, ya komandaların Bakı üçün güzəştə gedəcəyinə, ya da o vaxta kimi tikintisi nəzərdə tutulan Olimpiya stadionunun hazır olmasına ümid edə bilərik.