«Neftçi»: yeni mövsümdə qazanacağımız nəticələrlə…

Son günlər ölkəmizin bəzi idman mətbuatında Azərbaycan futbolunun flaqmanı "Neftçi"nin yeni transferləri haqqında qərəzli yazılar dərc olunmaqdadır. Azerisportşaz xəbər verir ki, "Neftçi" PFK bəyanat yayıb: "Flaqman rəhbərliyi yeni mövsümdən etibarən Azərbaycan Premyer Liqasında və ölkə kubokunda yalnız qələbə qazanmağı qarşısına məqsəd qoyub. Bunun üçün klubda lazımlı islahatlar aparılıb. Yeni mövsümdən etibarən yığma komandamızın üzvləri ilə yanaşı komandamızda gənc və perspektivli futbolçulara heyətdə yer verilib. Həmçinin klub rəhbərliyi əcnəbi futbolçuların transferi məsələsinə də çox ciddi yanaşaraq almaq istədiyi oyunçuları yaxından izləmək məqsədilə seleksiya işlərinə start verdi.

 

Bu məqsədlə baş məşqçi Arif Əsədovla Mətbuat və İctimaiyyətlə Əlaqələr Departamentinin rəhbəri Elnur Əşrəfoğlu Avstriyaya ezam olundular Komandamız ilk olaraq Makedoniya yığmasının əsas simalarından biri olan yarımmüdafiəçi Slavko Georgievskini transfer etdi. Uzun illər ölkə xaricində top qovan futbolçu Makedoniya yığmasının ən aparıcı üzvlərindən biridir. Premyer Liqa davam edərkən klubun vitse-prezidenti Tahir Süleymanov və seleksiyaçı-məşqçi Bəxtiyar Musayev Braziliyaya yollanaraq futbolçuları izləyirdilər.

 

Flaqmanın həyata keçirdiyi ikinci transferdə böyük səs-küyə səbəb oldu, belə ki, Braziliya A seriyasının komandalarından olan "Qremio Prudente"nin müdafiəçisi Denis Silva bir çox təkliflərə baxmayaraq məhz "ağ-qaralı" formanı geyməyə razılıq verdi. Öz açıqlamalarında "Neftçi"nin böyük klub olmasını qeyd edən braziliyalı futbolçu bu amilin keçidində böyük rol oynadığını vurğuladı.Lakin bəzi mətbuat orqanları bütün görülən işlərə gölgə salmaq istəyi ilə qərəzli yazılar dərc edirlər. Belə yazıları yazanlar ən azından özlərinə hörmət etməlidirlər. Flaqmanın böyük adından istifadə edərək özünü reklam etmək peşəkarlıq deyil. Flaqman hər zaman kütləvi informasiya vasitələri ilə yüksək səviyyəli əlaqələr qurub və bu ənənəni davam etdirəcək. "Neftçi" PFK rəhbərliyi olaraq bildirmək istəyirik ki, yeni mövsümdə qazanacağımız nəticələrlə doğru yolda olduğumuzu sübut edəcəyik".