«Olimpiya» - «Xəzər Lənkəran» matçı televiziya ilə göstərilməyəcək

«İdman Azərbaycan» telekanalının gələn həftə üçün proqramında sözügedən matç yoxdur. Digər yerli kanallar da özlərinin həftəlik proqramlarında bu oyuna yer ayırmayıblar.

 

«İdman Azərbaycan»ın əlimizdə olan həftəlik proqramında cümə axşamı günü – iyulun 1-də saat 20:30-da futbol üzrə Avropa Liqasının birinci təsnifat mərhələsi çərçivəsində «Qarabağ»la «Metalurq» (Makedoniya) arasında oyunun canlı yayımı nəzərdə tutulub. Lənkəranlıların oyunu barədə heç bir qeyd yoxdur.

 

Bir müddət öncə qeyd etdiyimiz kimi, azarkeşlərin böyük marağına baxmayaraq, Avrokuboklarda komandalarımızın səfər oyunları nadir hallarda televiziya kanallarımız vasitəsilə translyasiya olunur. Adəti üzrə, bunun üçün komandanın rəhbərliyinin iradəsi olmalıdır ki, nəticədə, bu, həlledici amilə çevrilir. Yəni komanda özü translyasiyanın təşkili üçün tələb olunan bir neçə min dolları ödəyirsə, hər hansı kanal oyunu yayımlayır. Başqa hallarda kanalların özləri tərəfindən belə təşəbbüsə rast gəlinmir.

 

Ümid edirik ki, söz verdiyi kimi, KATV1 kabel televiziyası azarkeşlərin gözünü yolda qoymayacaq və Moldovadakı oyunu izləyə biləcəyik.