Arda və Tuncay «Bakı»ya gəlir

azerisport.az «Bakı» futbol klubunun rəsmi saytına istinadla bildirir ki, Türkiyə yığma komandası Avro-2012 seçmə mərhələsi çərçivəsində oktyabr ayının 12-də Tofiq Bəhramov adına Respublika stadionunda keçiriləcək Azərbaycan – Türkiyə oyununa hazırlığı “Bakı” futbol klubunun təlim məşq bazasında keçirəcək.

 

Ötən həftə Türkiyə Futbol Federasiyasının (TFF) milli komandalar şöbəsinin müdiri Tan Kesler “Bakı” klubunun təlim-məşq bazası ilə tanış olub və şəraitdən razı qalıb. Əldə olunmuş razılığa görə, Türkiyə milli komandası oktyabrın 10-da Bakıya gələrkən məhz paytaxt klubunun təlim-məşq bazasında məskunlaşacaq.

 

Almaniya millisi də analoji addım atmaq niyyətindədir. Dünya çempionatı başa çatdıqdan sonra Bundestimin menecerləri “Bakı” futbol klubunun bazasına baş çəkəcəklər. Razılıq əldə olunacaq təqdirdə Almaniya yığma komandası 07.06.2011-ci il tarixdə keçiriləcək Azərbaycan – Almaniya oyununa “Bakı” futbol klubunun təlim-məşq bazasında hazırlaşacaq.