Belçika saytı Neftçini erməni klubu adlandırdığına görə uzr istəyib

"Neftçi" PFK Unibank Premyer Liqasına hazırlıq məqsədilə Avstriyada keçirdiyi təlim-məşq toplanışı başa vurmaq üzrədir. Azerisport.az xəbər verir ki, flaqman təlim-məşq toplanışı çərçivəsində yoldaşlıq görüşləri keçirməklə yanaşı, heyəti formalaşdırmaq üçün bir sıra əcnəbi futbolçuları da sınayır. Bu günlərdə Belçikanın "Genk" klubundan Moussa Koita "Neftçi"nin düşərgəsində baxışda olub. "Ağ-qaralılar"ın məşqçi korpusu Koitaya Rumıniyanın "Universitatea Kluj" klubu ilə yoxlama matçında forma geyinmək şansı versə də, hücumçunun oyununu bəyənməyərək, onu geri qaytarıb.

 

Lakin Koitanın "Neftçi"də baxışda olması ilə bağlı Belçika mətbuatında dərc olunan yazılarda yanlışlığa yol verilib. Belə ki, www.voetbalbelgie.be saytında yerləşdirilən məqalədə "Neftçi" Ermənistan təmsilçisi kimi təqdim olunub. Flaqmanın Mətbuat və İctimaiyyətlə Əlaqələr Departamentnin rəisi Elnur Əşrəfoğlunun sözlərinə görə, bununla əlaqədar artıq qarşı tərəfə müraciət olunub: "Biz xəbərdə "Neftçi"nin Azərbaycan yox, işğalçı Ermənistan klubu kimi təqdim olunması ilə bağlı həm www.voetbalbelgie.be saytına, həm də Belçika Futbol Federasiyasına məktub ünvanlamışıq. Onlar bizdən üzr istəyərək, bu nöqsanın tezliklə aradan qaldırılacağını bildiriblər.

 

Bir məqamı da qeyd etmək istəyirəm ki, www.voetbalbelgie.be saytı öz-özünə zidd gedib. Həmin saytda bundan bir neçə gün öncə yerləşdirilən xəbərdə isə "Neftçi"nin 2005-ci ildə Çempionlar Liqasının ikinci təsnifat mərhələsində "Anderlext"lə oynadığı xatırlanmışdı və komandamız Azərbaycan təmsilçisi kimi göstərilmişdi. Ancaq nədənsə, növbəti xəbərlərin birində Koitanın Ermənistan klubu olan "Neftçi"də baxışda olduğu yazılıb. Göründüyü kimi, sayt rəhbərliyi kobud səhvə yol verib. Bu məsələdə bizə dəstək göstərən Azərbaycanın bütün KİV nümayəndələrinə minnətdarlığımızı bildiririk. İnanıram ki, bundan sonra da Azərbaycana, o cümlədən ölkə idmanına qarşı xarici mətbuatın qəsdən və ya bilməyərəkdən buraxdığı səhvlərin öhdəsindən birgə gələcəyik".