14 iyul 2010 00:12
Hafiz Məmmədov: Liverpul və Yuventus-la qrup mərhələsində qarşılaşmaq əla olar
Azərbaycan Kubokunun sahibi Avroliqanın oyunlarına hazırlığını davam etdirir. Azerisport.az xəbər verir ki, "Baki" klubunun məşqini klubun prezidenti Hafiz Məmmədov da izləyib.
Klubumuzun fəxri prezidenti Anar Məmmədovla birlikdə axşam məşqini diqqətlə seyr edən Hafiz Məmmədov məşqçi heyəti və futbolçularla səmimi söhbət zamanı komandaya güvəndiyini söylədi. Hafiz Məmmədov “Buduçnost” klubuna qarşı oyunda komandamıza uğurlar arzuladı.
Klub prezidenti daha sonra "Bakı"nın Avropa Liqası turnirində iştirakı ilə bağlı fikirlərini “Bakı” klubunun rəsmi internet səhifəsi ilə bölüşdü: “Əhval-ruhiyyə əladır. Futbolçuların necə həvəslə məşq etdiyinin şahidi oldum. Bu məni ümidləndirməyə bilməz. Yeganə narahatçılığım yeni futbolçularımızın kollektivə uyğunlaşması ilə bağlıdır. Amma əminəm ki, Vinfrid Şeferin başçılıq etdiyi təcrübəli məşqçilər korpusu bu çatışmazlığı aradan qaldıracaq”.
Hafiz Məmmədov oyunun müqəddəratının ilk oyunda həll olumasının mümkünlüyünə də toxunub: “Elə istəyimiz budur. İstəyirik ki Podqoritsada keçiriləcək cavab oyunu üçün münasib nəticəni burada əldə edək. Məncə, “Bakı” klubunun hazırkı səviyyəsi bu tapşırığın öhdəsindən gəlməyə imkan verir”.
Avroliqanın III mərhələsində daha səviyyəli komandalar var. “Liverpul”, “Yuventus” kimi potensial rəqibləri buna misal göstərmək olar. Amma klub prezidenti təsnifat mərhələsində böyük klublarla qarşılaşmağı arzuolunmaz sayır. “Sözsüz ki, Avropanın adlı-sanlı klubları ilə qarşılaşmaq istərdik. Amma bunun qrup mərhələsində baş tutması əla olardı. Bildiyiniz kimi, bu il “Bakı”nın qarşısında qoyulan minimum vəzifə ötənilki uğuru təkrarlayaraq, Avroliqanın play-off mərhələsinə çıxmaqdır. Amma könlümüzdən ilkə imza ataraq qrup mərhələsinə yüksəlmək kimi maksimum proqram keçir. O zaman azarkeşlərimizə “Liverpul”, “Yuventus” kimi komandalarla qarşılaşmaq sevinci bəxş etmək istəyirik”.
