Anatoliy Ponomaryov: Neftçi yaxşı oyun göstərdi
Azərbaycan milli komandasının sabiq üzvü, hazırda Türkiyənin "Orduspor" klubunun şərəfini qoruyan Anatoli Ponomaryov "Neftçi" ilə yoldaşlıq görüşü barədə fikirlərini bildirib. Azerisport.az "neftçilərin" rəsmi saytına istinadən xəbər verir ki, 28-yaşlı futbolçu "Neftçi"-nin qələbəyə layiq oyun göstərdiyini vurğulayıb: "Öncə onu deyim ki, həmyerlilərimlə qarşılaşmaq mənə çox xoş idi. Fikrimcə, 0:4 hesabı təsadüfi olmadı. Çünki "Neftçi" yaxşı oyun göstərməklə, qələbəyə tam layiq olduğunu sübuta yetirdi. Bu komandada ən çox xoşuma gələn isə kollektiv oyun, birlik oldu. Heyətdə gənc və istedadlı futbolçuların yer alması yaxın gələcəkdə böyük uğurların qazanılacağından xəbər verir. Öz oyunuma gəlincə, bizdə heç nə alınmadı. Ümumiyyətlə, karyeramı "Orduspor"da davam etdirib-etdirməyəcəyimi bilmirəm".
