Ruslan Abışov: Heç vaxt öz oyunumdan razı qalmıram

Azerisport.az xəbər veriri ki, Neftçi'nin müdafiəçisi Ruslan Abışov Orduspor'la oyun haqqında danışıb.

 

Öncə "Orduspor"la oyun barədə fikirlərini bilmək istərdik.

Qarşılaşmaya yaxşı hazırlaşmışdıq. Açığı, hesabın belə böyük fərqli olacağını gözləmirdim. Qalib gələcəyimizi düşünürdük, rəqib qapısından 4 top keçirməyimiz isə xoş sürpriz oldu. Əlimizə düşən imkanlardan yaxşı istifadə etdiyimiz üçün böyük hesablı qələbə qazandıq.

 

Əvvəlki yoxlama matçları ilə müqayisədə, bu dəfə flaqmanın oyununda hansı müsbət cəhətlər hiss olunurdu?

Artıq yeni mövsümə hazırlığın ikinci, sonuncu mərhələsi gedir. İndi futbolçular özlərini daha yaxşı, daha hazırlıqlı hiss edirlər. Bunun da bəhrəsini növbəti yoldaşlıq görüşlərində görəcəyik. Ən əsası odur ki, zəhmətimiz öz nəticəsini Premyer Liqada versin. Çox sevindirici haldır ki, "Orduspor"la qarşılaşmada kollektiv oyun göstərməyi bacardıq. Komandamız günü-gündən inkişafdadır. Bizə yaratdığı bütün şəraitə görə, başda prezident Sadıq Sadıqov olmaqla, klubumuzun rəhbərliyinə minnətdarlığımı bildirirəm. İnanıram ki, milli çempionatda rəhbərliyin etimadını doğruldaraq, yüksək nəticələr qazanacağıq.

 

"Orduspor"la görüşdə öz oyunundan razı qaldınmı?

Düzünü deyim ki, heç vaxt öz oyunumdan razı qalmıram. Ancaq nəzərə alsaq ki, yoxlama matçında 4:0 hesablı qələbə qazanmışıq, deməli, komandanın bütün üzvləri yaxşı çıxış ediblər.

 

Premyer Liqanın növbəti mövsümünün püşkatmasına da münasibətini öyrənmək istərdik. Çempionatın startında "Neftçi" evdə "Qarabağ"ı qəbul edib, ardından "Qəbələ" ilə səfər matçına yollanacaq. Püşkün nəticəsi flaqman üçün nə dərəcədə əlverişlidir?

Mənə elə gəlir ki, startda güclü rəqiblərlə oynamaq zəif komandalara qarşı mübarizə aparmaqdan yaxşıdır. İnşallah, ilk turlarda uğurlu nəticə qazanıb, yolumuza inamla davam etmək niyyətindəyik. Bizim yeganə məqsədimiz çempionluqdur.

 

Klub saytı