25 iyul 2010 13:05
Elmar Baxşiyev: Əsas hədəfimiz çempionluqdu
Azerisport.az Azərbaycanın "Neftçi" klubunun rəsmi saytına istinadən xəbər verir ki, komandanın yarımmüdafiəçisi Elmar Baxşiyev Türkiyənin Bolu şəhərində keçirilən təlim-məşq toplanışının gedişatı barədə fikirlərini bildirib.
"Boludakı təlim-məşq toplanışı çox yaxşı gedir. Gündə iki dəfə məşq edirik. Bütün şəraiti yaratdığınna görə klubumuzun prezidenti Sadıq Sadıqova minnətdarlığımı bildirəm. Həqiqətən də təlim-məşq toplanışında heç bir çətinliyimiz yoxdur. İnşallah, zəhmətimizin bəhrəsini çempionatda görərik, həm klub rəhbərliyini, həm də azarkeşlərimizi sevindirərik", - Baxşiyev bildirdi.
Təcrübəli futbolçu flaqmanın oyununun günü-gündən inkişaf etdiyini söyləyib: "Orduspor"la matçda kollektiv oyun nümayiş etdirdik. Bu bir daha onu göstərir ki, komandamızda günü-gündən inkişaf var. Düzdür, yeni oyunçuların kollektivə uyğunlaşmasına bir qədər də vaxt lazımdır. Lakin xüsusilə cavan futbolçuların gəlişindən sonra komanda daha istəkli görünür. "Neftçi"nin böyük potensialı var. Hamıya məlumdur ki, "Neftçi" əsas milli komandaya, eləcə də aşağı yaş qruplarından ibarət yığmalara ən çox futbolçu verən klubdur. Şübhəsiz ki, yeni mövsümdə əsas hədəf Premyer-Liqanın qızıl medallarını qazanmaq olacaq".
Həmçinin, Baxşiyev avrokuboklarda uğurla çıxış edən "Qarabağ" klubunu da təbrik etdi: "Avropa Liqasının üçüncü mərhələsinə yüksəlməsi münasibətilə "Qarabağ"-ı təbrik edirəm və daha irəli getməyi arzulayıram".
