26 iyul 2010 00:02
Arif Əsədov: Futbolçularımızdan razı qaldım
Azerisport.az Azərbaycanın "Neftçi" klubunun rəsmi saytına istinadən xəbər verir ki, komandanın baş məşqçisi Arif Əsədov Türkiyədə keçirilən təlim-məşq toplanışı barəsində öz fikirlərini bildirdi.
"Kardemir Karabükspor"-la görüşdə futbolçularımızdan razı qaldım. Artıq oyundan-oyuna komandamızda inkişafı görmək mümkündür. "Orduspor" matçı ilə müqayisədə, bu dəfə "Neftçi"-nin oyununda keyfiyyət baxımından artım hiss olunur. Məşqlərdə "yükləmə"ni azaltdıqca, futbolçulara yeni güc gəlir ki, bunun da sayəsində onlar tapşırdığımız taktiki gedişləri yerinə yetirməyə çətinlik çəkmirlər. Komanda "Kardemir Karabükspor"la matçda daha istəkli görünürdü, balanslaşmış oyun aparırdı, həm müdafiədə, həm də hücumda inamlı təsir bağışlayırdı", - Əsədov deyib.
O, bu gün Türkiyənin Bolu şəhərində "Kardemir Karabükspor"la keçirilən yoxlama matçında flaqmanın mübarizliyini qiymətləndirib: "Həqiqətən də görüşün 60-70-ci dəqiqələrində rəqib təzyiqi artıraraq, qapımız önündə təhlükəli epizodlar yaradırdı. İkinci hissədə çoxlu əvəzləmələr etdik. Dəyişikliklərdən sonra istər-istəməz xətlərarası əlaqələr bir az kəsilir, balans itir. Əsas odur ki, komandamız sona qədər mübarizə apardı və qələbə hesabını final fitinədək qorudu".
Əsədov bildirib ki, iyulun 28-də "Qaziantep Böyükşehir Bələdiyyəspor"la yoldaşlıq oyununda da hədəf qələbə qazanmaqdır: "Türkiyədəki son hazırlıq matçında da qalib gəlmək istəyirik ki, həm Premyer Liqanın startı ərəfəsində komandada əhval-ruhiyyəni daha da yüksəldək, həm də futbolçularda özünəinam hissi artsın. Çox sevindirici haldır ki, Türkiyədəki təlim-məşq toplanışında qol buraxmamışıq. Hazırlıq görüşlərində əsas məqsədimiz qapımızın toxunulmazlığını saxlamaqla, qol buraxmaq idi. Hələ ki, işlərimiz plana uyğun gedir".
