Özbəkistan yığmasının üzvü Bakıya gəlib

“Neftçi” PFK ilə Rusiya çempionu “Rubin” klubu arasında qarşılıqlı əməkdaşlıq mövcuddur. Azerisport.az xəbər verir ki, Azərbaycan futbolunun flaqmanı Rusiyanın ən güclü klubu ilə futbolçu mübadiləsi və digər sahələr üzrə əlaqələr qurur. Məhz bu əməkdaşlıq çərçivəsində “ağ-qaralar” ötən ay “Rubin”dən özbəkistanlı Bahodir Nasimovu transfer etdi. Nasimov yoxlama matçları da daxil olmaqla, meydana çıxdığı hər 6 oyunda qol vuraraq, “Neftçi”yə yardım göstərə biləcəyini sübuta yetirdi.

 

İki klub arasında əməkdaşlığın davamı olaraq, “Rubin”in daha bir futbolçusu Bakıya gəlib. Bu, 22 yaşlı özbəkistanlı yarımmüdafiəçi Vaqiz Qaliulindir. 2006-cı ildən “Rubin”in şərəfini qoruyan Qaliulin Özbəkistan yığmasının da üzvüdür. Artıq paytaxtımızda olan futbolçu “Neftçi”nin heyətində məşqlərə qoşulub. Qeyd edək ki, flaqmanın da bir neçə gənc oyunçunun “Rubin”in düşərgəsinə yollanacağı gündəmdədir.