Kaxaber Sxadadze: Mən tənqidi normal qəbul edirəm

Azerisport.az saytı sizə Azərbaycanın "İnter" klubunun baş məşqçisi Kaxaber Sxadadzenin müsahibəsini təqdim edir.

 

Öncə "Xəzər-Lənkəran"-la oyun haqqında fikirlərinizi bilmək istərdik. Nəticədən və oyunun səviyyəsindən razıqaldınızmı?

Oyunu rəqibə və meydançaya uyğun qurmuşduq, ona görə ki, bildiyiniz kimi, biz qısa ötürmələr vasitəsilə kombinasiyalı oyun sərgiləyirik. Ancaq bunu belə otörtüyündə həyata keçirmək, sadəcə, mümkün deyil. "Xəzər-Lənkəran" oyun üslubunu ötən illə müqayisədə radikal şəkildə dəyişib. Onlar aksenti uzun ötürmələr və güc mübarizəsi üzərinə keçiriblər. Biz buna cavab olaraq meydanın mərkəzini, müdafiə mərkəzini möhkəmləndirdik və Poşkus və Odikadze kimi futbolçularımıza ümid edərək, diqqətimizi əks-hücumlara yönəltdik. Hesab edirəm ki, bizdə alındı və irəlidə yaxşı oynamağı bacardıq.

 

Komandada bir neçə hücumçu var, bununla bərabər Poşkus və Karlsons təxminən eyni tip oyunçulardır. Bu mövqeyi möhkəmləndirməyi düşünürsünüzmü?

Bizim oyun üslubumuz iki yox, bir mərkəz hücumçusu üzərində qurulub. Buna görə də, növbə ilə onları meydana çıxaracağıq. Poşkus da, Karlsons da səviyyəli futbolçudurlar və hesab edirəm ki, bu mövqeyi gücləndirməyə ehtiyac yoxdur. Transfer pəncərəsinin bağlanmasına qədər yalnız mərkəz xəttini gücləndirmək lazımdır. Bizə daha bir dayaq müdafiəçisi lazımdır.

 

Konkret olaraq hansısa futbolçunu nəzərdən keçirirsiniz?

Hələlik heç kimi nəzərdən keçirmirik.

 

Zədələr barədə nə deyə bilərsiniz? Son zamanlar zədələr komandada artıb. Bunu nə ilə izah edərdiniz? Kifayət qədər fiziki formada olmamaqla, yoxsa başqa səbəblərlə?

Yox, fiziki forma məsələsində hər şey qaydasındadır, bunu XL-lə oyunda da gördünüz. Biz əla görünürdük, "Xəzər-Lənkəran"-sa oyunun bitməsinə iyirmi dəqiqə qalmış çox yorulmuşdu. Burada süxurun dəyişməsi futbolçular üçün böyük rol oynayır. Biz ev oyunlarımızı süni otörtüyündə, səfər oyunlarınısa təbii otörtüyündə oynayırıq. Buna görə də, bu, xüsusilə də baldırla pəncəni birləşdirən oynaqlara ciddi təsir göstərir.

 

Zlatinovun zədəsinə gəldikdə deyə bilərəm ki, o, zədəni hələ "Lex"-lə oyun zamanı almışdı. Mcavanadze məişət zədəsilə üzləşib. Levin isə məşq zamanı zədə alıb. Eyni sözü Çertoqanov barəsində də demək olar. Mən meydançaların dəyişməsini qeyd etmişdim, biz hamar sintetikada oynayırıq, sonrasa təpəciklər çox olan təbii otörtüyündə oynamağa başlayırıq ki, bu da oyunçulara mənfi təsir göstərir. Yeganə mənim üçün tapmaca olaraq qalır-o da Rövşən Əmiraslanovun zədəsidir. O, anlaşılmayan vəziyyətdə oyunun lap əvvəlində əzələsini dartdı. Kandelakinin əli sınıb, lakin bu da fiziki məşqlərə təsir göstərən zədədir.

 

Qarşıdakı "Neftçi" ilə matç barəsində nə deyə bilərsiniz?

Onların "Simurq"-la oyununa hələ baxmamışam, lakin bu günlərdə mütləq baxacağam. Onlar haqqında nə demək olar? "Neftçi" hissediləcək qədər güclənib və yaxşı oynamağa başlayıb. Düşünürəm ki, "Neftçi" çempionluğa namizədlərdən biridir. Çox çətin olacaq.

 

Sizinlə Rednik arasında baş vermiş xoşagəlməz epizoddan da yan keçmək olmur...

Mən anlamıram, nəyə görə media mənim mətbuat konfransında dediklərimi sonacan işıqlandırmır? Mən onların belə yazmalarını başa düşmürəm. Mən bir daha baş vermiş hadisəyə toxunmaq istəyirəm. Qarşılaşmanın 21-ci dəqiqəsində Rövşən Əmiraslanov zədə aldı, rəqibin məşqçisisə futbolçularına topu meydançadan kənara çıxarmaq barədə göstəriş vermədi. Bir qədər sonra biz irəliyə getdik və o zaman "Xəzər-Lənkəran"-ın futbolçusu zədə alaraq yerə yıxılmışdı- biz centlemenlik əlaməti olaraq topu meydançadan çıxardıq ki, həkimlər meydançaya çıxa bilsinlər. Halbuki biz davam edə bilərdik, axı, təhlükəli hücum yaranırdı.

 

Kandelakinin yıxılması epizoduna gəldikdəsə, burada oyunu dayandırmaq lazım idi. Onlarsa bunu etmədilər. Amma bu da bəla deyildi. Bəla onda idi ki, həmin məşqçi mənim futbolçumun ünvanına ədəbsiz ifadələr işlətdi, simulyant adlandırmaqla onu təhqir etdi və təbii ki, məşqçilərinin davranışlarından çıxış edərək lənkəranlı azarkeşlər futbolçunun simulyant etdiyini düşündülər. Lakin oyunsonrası mətbuat konfrasında dedim ki, "Xəzər-Lənkəran"-ın ən yaxşı, ən ədalətli və ən coşqun azarkeşləri var. Lənkəranda tribunları dolmuş meydançada oynamaq həmişə zövq verir. Ümid edirəm ki, onlar məsələni düşgün anlayacaqlar və həmin epizodu obyektiv qiymətləndirəcəklər. Əgər onlar hesab edirlər ki, mən doğru deyiləm, o zaman, ola bilsin ki, üzr istəyə bilərəm. Lakin mən düşünmürəm ki, onları təhqir etmişəm. Axı, biz hamımız-futbolçular və məşqçilər azarkeşlər üçün oynayır və qələbə qazanırıq. Bu oyundur, bu futboldur-bütün bunlar onlar üçündür. Əgər onlara nəsə xoş gəlməyibsə, onların bunu demək hüquqları var. Yeganə xahişim budur ki, vəziyyəti dəqiq araşdırsınlar və orada həqiqətən də nə baş verdiyini öyrənsinlər.

 

Son zamanlar Siz tez-tez mətbuatın, konkret olaraq bir mətbuat vasitəsinin anlaşılmayan hücumlarıyla qarşılaşırsınız...

Həmin mətbuat vasitəsinin ötən ildən bizə hansısa iddiaları var. Biz hesab edirik ki, onlar çempionata düzgün olmayan mövqedən yanaşaraq, onu qeyri-obyektiv işıqlandırırdılar. Digər mətbuat vasitələrini oxuyuram, hansılar ki analizlər edirlər, səviyyəli şəkildə oyunları araşdırırlar, taktikaya, futbolçuların oyunlarına toxunurlar, bir sözlə, işlə məşğul olurlar və bu, sevindirir. Mən tənqidə normal yanaşıram, lakin doğru və sağlam tənqidə. Onların yazdıqlarısa, sadəcə, şəxsi qərəzçilikdir. Qoy məni əgər heyətlə bağlı və sairə məsələlərdə buraxdığım səhvlərə görə peşəkarcasına tənqid etsinlər. Mən belə tənqidi normal qəbul edirəm və heç bir problem olmayacaq. Şəxsi qərəzçilik belə məsələlərdə olmamalıdır, şəxsi-şəxsidir, peşəkarlıq-peşəkarlıqdır... Hər kəs öz işilə məşğul olmalıdır.

 

Mənbə: İnter PFK