24 avqust 2010 14:58
AFFA Sxadadzeni cəzalandırdı
AFFA-nın İntizam Komitəsi "İnter" klubunun baş məşqçisini cəzalandırdı. Azerisport.az AFFA-nın rəsmi saytına istinadən xəbər verir ki, Azərbaycan Premyer-liqasının 3-cü turunun "Xəzər-Lənkəran" – "İnter" matçının 85-ci dəqiqəsində "İnter" klubunun baş məşqçisi Kaxaber Tsxadadze rəqib komandanın baş məşqçisini təhqir etdiyinə görə texniki zonadan kənarlaşdırıldığı üçün baş məşqçi 5 oyunluq cəzalanır, klub 5000 manat cərimə olunur.
Həmçinin, "Xəzər-Lənkəran" klubunun icraçı direktoru Höccət Hacıyev oyun başlamazdan əvvəl, həmçinin fasilə zamanı dəfələrlə matçın hakimlərinə etirazını bildirmişdir. Oyun başa çatdıqdan sonra Höccət Hacıyev hakimlər otağına daxil olaraq hakimlərin ünvanına nalayiq ifadələr işlətmiş və onlara hədə-qorxu gəlmişdir. Yuxarıda göstərilənləri nəzərə alaraq Höccət Hacıyev 10 oyunluq cəzalanır, klub 9000 manat cərimə olunur. Hacıyevin oyun zamanı oyunçuların paltardəyişmə otağına, oyun keçirilən meydana və ona bitişik ərazilərə daxil olması qadağandır (cəza müddəti bitənədək).
Bundan başqa, "Bakı" – "Qəbələ" matçının 30-cu dəqiqəsində "Bakı" klubunun futbolçusu Xalidu Sissoko rəqibə qarşı qeyri-etik jestə görə birbaşa qırmızı vərəqə alaraq meydandan kənarlaşdırıldığı üçün 3 oyunluq cəzalanır, klub 2000 manat cərimə olunur. Matçın 89-cu dəqiqəsində "Qəbələ" klubunun futbolçusu Milan Antiç rəqibə tüpürdüyünə görə birbaşa qırmızı vərəqə alaraq meydandan kənarlaşdırıldığı üçün 6 oyunluq cəzalanır, klub 5000 manat cərimə olunur Oyunun 90+2-ci dəqiqəsində "Qəbələ" klubunun futbolçusu Lyuba Baranin rəqibi təhqir etdiyinə görə birbaşa qırmızı vərəqə alaraq meydandan kənarlaşdırıldığı üçün 3 oyunluq cəzalanır, klub 2000 manat cərimə olunur.
Mənbə: AFFA
