12 sentyabr 2010 21:17
Mirça Rednik: İki ayrı hissə keçirdik
Azərbaycan Premyer-liqasının 5-ci turunda "Xəzər-Lənkəran" MOİK-I qəbul etdi. Azerisport.az PFL-in rəsmi saytına istinadən xəbər verir ki, XL rəqibini 3:0 hesabı ilə məğlub edərək turnir cədvəlində vahid liderliyi ələ keçirdi.
"Əvvəlki oyunlarda olduğu kimi yaxşı çıxış etmək istəyirdik, lakin bu gün oyunumuz alınmadı, məğlub olduq. Heyətlə bağlı problemlərimiz var idi. Cəza və zədə səbəbindən 3 oyunçumuz bu qarşılaşmada iştirak etmirdi. Bu da oyunumuza öz təsirini göstərdi. Əvəzedici heyətdən 2 futbolçu götürmək məcburiyyətində qaldıq. "Xəzər-Lənkəran" komandasına uğurlar arzu edirəm", -MOİK-in baş məşqçisi Ramil Əliyev dedi.
"Komandamız bu gün qalib gəldi, lakin iki ayrı hissə keçirdik. İlk hissədə üç qol vursaq da, ikinci hissədə əlimizə düşən imkanlardan istifadə edə bilmədik. Meydanın durumu çox da yaxşı deyildi. Növbəti turda qarşılaşacağımız "Muğan"la oyuna daha ciddi hazırlaşacağıq. Uinston Parksın komandaya daha tez adaptasiya olduğunu qeyd etmək istərdim", -XL-ın çalışdırıcısı Mirça Rednik bildirdi.
