26 sentyabr 2010 20:10
Nazim Süleymanov: Qalib gəlmək vacib idi
Azərbaycan Premyer-liqasının 7-ci turunda doğma meydanda AZAL klubu MOİK-i qəbul etdi. Azerisport.az PFL-ın rəsmi saytına istinadən xəbər verir ki, AZAL rəqibini 2:0 hesabı ilə məğlub edərək turnir cədvəlinin üçüncü pilləsinə yüksəldi.
"İki ardıcıl məğlubiyyətdən sonra qalib gəlmək istəyirdik. Təəssüf ki, buna nail ola bilmədik. Heyətimizdə bir sıra itkilərimiz var idi, bu da oyunumuza öz təsirini göstərdi. Qarşıdakı oyunlarda xal ehtiyatımızı artırmağa çalışacağıq. AZAL klubuna uğurlar arzu edirəm", - MOİK-in baş məşqçisiRamil Əliyev dedi.
"Bugünkü oyunda qalib gəlmək bizə vacib idi. Buna nail olduğumuz üçün şadam. Futbolçularımı qələbə münasibəti ilə təbrik edirəm. İstərdim ki, futbolçularımız qol imkanlarından maksimum yararlansınlar. MOİK klubuna qarşıdakı oyunlarda uğurlar arzulayıram", - AZAL-ın çalışdırıcısı Nazim Süleymanov bildirdi.
