7 oktyabr 2010 16:50
Zaur Tağızadə məşqçi oldu
Futbolçu karyerasını yenicə bitirmiş Zaur Tağızadə "Neftçi" klubunun əvəzedici heyətinin məşqçisi vəzifəsinə təyin olunub. Azerisport.az "neftçilərin" rəsmi saytına istinadən xəbər verir ki, klubun bazasında "Neftçi" rəhbərliyinin və məşqçilər korpusunun iştirak etdiyi mərasimdə yeni məşqçini təqdim edən klub prezidenti Sadıq Sadıqov Zaur Tağızadənin müstəqil Azərbaycan futbolunun yetişdirdiyi ən güclü oyunçulardan biri olduğunu bildirib.
"Zaurun xüsusi təqdimata ehtiyacı yoxdur. O, Azərbaycan futbolunda "Qızıl oğlan" kimi ad qazanıb. Onun "Neftçi"-nin uğurlarında əməyi böyükdür. Tağızadəni diqqətimizdən kənar saxlaya bilməzdik. Özünün də istəyi ilə ona "Neftçi"-nin əvəzedici heyətinin məşqçisi vəzifəsini etibar etdik. İnanıram ki, Zaurun məşqçiliyi də futbolçu karyerası kimi parlaq olacaq".
Yeni məşqçi klub prezidentinə ona göstərilən etimada görə təşəkkürünü bildirib: "Futboldan, xüsusilə də "Neftçi"-dən ayrı qalmaq mənə çətin idi. Artıq məşqçi kimi doğma komandama kömək etmək qərarına gəldim. Sağ olsun Sadıq müəllim, təklifimi dərhal qəbul elədi. Klub rəhbərliyinin mənə göstərdiyi etimadı doğrultmağa çalışacağam".
Qeyd edək ki, ötən mövsümədək "Neftçi"nin şərəfini qoruyan Tağızadə əvəzedici heyətin bundan sonrakı oyunlarına hazırlaşmasında baş məşqçi İqor Getmana kömək edəcək.
