Azərbaycan sayağı qələbə və Hiddinkin Bakı sindromu

Sonuncu dəfə millimiz doğma meydanda rəsmi oyunlar çərçivəsindəki qələbəsini Finlyandiya ilə 2007-ci ildə keçirilən oyunda görüb. Həmin görüş də 1:0 hesabı ilə bizim xeyirimizə bitmişdir. Bu dəfə isə Finlyandiyadan daha güclü rəqib – Türkiyə yığması idi. İlk dəqiqədən demək olardır ki, oyun maraqlı və gərgin alınacaq. Düzdür, nəticədə gərginlik daha çox idi. Lakin əminliklə söyləmək olar ki, oyun heç kəsi yuxuya salmadı. Əlbətdə türklər qələbə dalınca gəlmişdir. Və əlbətdə hesab edirdilər ki, bu qələbə asancasına əldə olunacaq. Amma bu belə olmadı. Buna görə iki amilə minnətdarlıq bildirmək olar - əzmkarlıq və bəxtə! Əzimkarlıq – oyun boyu, bəxt – oyunun sonunda. Demək olmaz ki, Türkiyənin bəxti gətirmədi. Təkcə ikinci yarıda hesab 3:0 ola bilərdi. Ancaq indi buna kimdi baxan? 1:0 yoxsa 3:0 - əsas odur ki, hesab Azərbaycanın xeyirinədir.

 

Lakin bütün eyforiyaya baxmayaraq, komandamızda ciddi nöqsanlar da var idi. Əsasən də müdafiənin mərkəzində. Elə məqamlar olurdur ki, türklər sakitcə müdafiəni yararaq, Kamran Ağayevin qarşısında peyda olunurdu. Yenə də hücum quruluşunda komanda bəzi çətinliklərlə üzləşirdi. Ancaq ötən iki oyunla müqayisə etsək, bu dəfə hücum xətti daha yaxşı görünürdü. Xüsusən Vüqar Nadirovu qeyd etmək olar. Düzdür, bu oyunda da onun tələsik hərəkətləri öz sözünü deyirdi, lakin Türkiyənin sağ cinahı ondan çox əziyyət çəkdi. Əsasən sürət baxımından. Kamrana isə ayrıca alqışlar. Bu qələbə onun adınadır. Çünki Kamranın etdiyi seyvlər türkləri bir növ şoka salırdı. Sanki qapıda insan yox, pələng dəyanırdı. Bəzi epizodlarda nümayiş etdirdiyi reaksiyası hamını heyran edirdi. Afərin, Kamran! Lakin buna baxmayaraq, yenə də künc ötürmələri zamanı mövqeyini hərdən itirdi. Yaxşı ki türklər bizim futbolçularımızdan o qədər də uca deyil. Qola gəldikdə isə... Əsl "Azərbaycan mətbəxi"! Küncdən sevimli Azərbaycan sayağı ötürmə və nəticədə – millimizin kapitanı, müdafiənin lideri Rəşad Sadıqov zərbə endirərək, hesabı açır.

 

Hiddink üçün isə Bakı bir sindroma çevirilib. Artıq ikinci dəfədir ki hollandiyalı mütəxəssis Azərbaycan yığması ilə Bakıda qarşılaşır. Və ikinci dəfədir ki, qələbə qazana bilmir. İndi Türkiyənin "teknik direktörü"-nün yığmadaki gələcəyi böyük sual altındadır.

 

Oyundan sonra millinin baş məşqçisi Berti Foqts xahiş etdi ki, futbolçuları tərifləmiyək. Herr Foqts, sizin istəyinizi başa düşmək olar və başa düşülür. Heç kəsə sirr deyil ki, elə futbolçularımız var ki hər bir tərifdən sonra özlərini dünya səviyyəli ulduz hesab edir. Digər tərəfdən, indi bu barədə düşünmək lazım deyil. Çünki yığmamızın seçmə mərhələdəki növbəti görüşü artıq gələn il Belçika ilə səfərdə baş tutacaq. Və məhz həmin qarşılaşmadan sonra söyləmək olar ki, Türkiyə üzərində qələbə komandamıza necə təsir etdi.