22 oktyabr 2010 21:09
Qalatasaray Neftçini məşqçisiz qoymaq istəyir
Bu gün Qalatasaray klubundan "Neftçi"yə məktub daxil olub. Azerisport.az xəbər verir ki, məktubda komandanın fiziki hazırlıq üzrə məşqçisi, italiyalı mütəxəssis Covanni Melkiorre danışıqlar aparmaq üçün İstanbula dəvət olunub. Qalatasaraya yeni təyin olunan baş məşqçi Georgi Hacı fiziki hazırlıq üzrə köməkçi kimi məhz Melkiorreni görmək istəyir.
İtalyan mütəxəssisin mövsümün sonunadək Neftçi ilə müqaviləsinin olmasına baxmayaraq, o, əvvəllər də çalışdığı Georgi Hacı ilə yenidən birlikdə işləmək üçün klub prezidenti Sadıq Sadıqovdan icazə istəyib. Bu haqda klub prezidentinin Qalatasarayın idman direktoru Adnan Sezginlə telefon danışığı olub.
“Neftçi ilə müqaviləmin olmasına baxmayaraq, mənə Qalatasarayın düşərgəsinə yollanmaq üçün şərait yaratdığına görə, klub prezidenti Sadıq Sadıqova təşəkkürümü bildirirəm. Azərbaycanın ən köklü klubunda işləmək mənim üçün böyük şərəfdir. Amma Georgi Hacı ilə uzun illər çiyin-çiyinə çalışmışıq. Hazırda isə o məni yenidən məşqçilər korpusunda görmək istəyir" - deyən Melkiorre İstanbula yollanıb.
"Qalatasaray" məşqçi ilə şəxsi müqaviləsinin şərtlərini razılaşdırdıqdan sonra hər iki klub rəhbərliyi arasında danışıqlar davam edəcək.
