XL legioneri ilə yollarını ayırdı
Azərbaycanın "Xəzər-Lənkəran" klubu hücumçusu Dieqo Ruizlə vidalaşdı. Azerisport.az XL-ın rəsmi saytına istinadən xəbər verir ki, tərəflər qarşılıqlı surətdə müqaviləni pozmaq qərarına gəliblər. Klubun vitse-prezidenti Tuyqun Nadirov bildirdi ki, argentinalı futbolçu ona olan ümidləri doğrulda bilməyib: "Xəzər-Lənkəran"-da olan dövrdə Ruiz yaxşı oyun göstərə bilməyib. Buna görə məşqçimiz onu əvəzedici heyətə göndərdi, ancaq Ruiz bundan imtina etdi. Onda biz düşündük ki, yaranmış vəziyyətdən ən yaxşı çıxış yolu müqaviləni qarşılıqlı pozmaqdır". Nadirov bildirdi ki, nə Ruizin XL-ə, nə də klubun bu futbolçuya qarşı iradı var. Vitse-prezident argentinalı futbolçuya uğurlar arzuladı: "Ola bilsin hansısa ayrı klubda o daha yaxşı oynasın, ancaq bizdə o forvardın üzərinə düşən vəzifəni yerinə yetirməyə qadir deyildi. İstənilən halda biz ona uğurlar arzu edirik".
