1 noyabr 2010 15:28
Neftçi UEFA`ya Galatasaray`la bağlı şikayət verəcək
Qeorqe Hacının Türkiyə təmsilçisi "Galatasaray"-a baş məşqçi təyin edilməsindən sonra, rumıniyalı mütəxəssis fiziki hazırlıq üzrə məşqçi qismində "Neftçi"-də çalışan italiyalı Covanni Melkiorreni görmək istədiyini açıqladı. Azerisport.az klubun rəsmi saytına istinadən xəbər verir ki, məhz "Neftçi" PFK-nın rəhbərlyinin icazəsi və özünün şəxsi istəyi ilə paytaxt komandası ilə müqaviləsi olan italiyalı mütəxəssisə "Galatasaray"-la danışıqlar aparmaq üçün İstanbula yollanmağa icazə verildi. Lakin Türkiyəyə danışıqlar aparmaq adıyla yola düşən Covanni Melkiorre haqqında "Galatasaray" klubunun rəsmi internet saytında yeni məlumat yerləşdirilib.
Belə ki, İstanbul təmsilçisinin rəsmi internet saytının "məşqçilər və texniki işçilər" bölümündə Covanni Melkiorre komandanın fiziki hazırlıq üzrə məşqçisi kimi göstərilib.
Qeyd edək ki, Covanni Melkiorrenin mövsümün sonuna qədər "Neftçi" ilə müqaviləsi mövcuddur. "Neftçi" PFK bu məsələ ilə bağlı UEFA-nın müvafiq qurumuna şikayət edəcək.
