4 noyabr 2010 17:58
Zidan Materassi ilə barışdı?
Fransa futbolunun əfsanəsi Zinəddin Zidan italiyalı müdafiəçi Marko Materassi ilə görüşdü. Azerisport.az xəbər verir ki, 2006-cı ildəki məlum hadisədən sonra bu Zidan və Materassi arasında ilk görüş oldu.
Onlar Milanda – Çempionlar Liqası çərçivəsində yerli komanda ilə qarşılaşmaq üçün burada olan "Real" oyunçularının qaldığı mehmanxanada qarşılaşıb. Materassi oraya onun "Inter"-in keçmiş baş məşqçisi Joze Mourinyo ilə görüşə gəlmişdi.
Məlumata görə, Zidan onunla çox soyuq salamlaşıb. Amma bir qədər sonra onların arasında qısamüddətli söhbət olub. Sonda Zidanla Materassi ilə bir birinin əlini sıxaraq, mehribancasına ayrıldılar.
Xatırladaq ki, 2006-cı il mundialının finalında İtaliya ilə Fransa millilərinin qarşılaşması bu iki futbolçu arasında insidentlə yadda qalmışdı. Materassinin təhqirinə dözməyən Zidan onu sinəsinə baş zərbəsi endirdi və nəticədə qırmızı vərəqə alaraq komandasını azlıqda qoymuşdu. Qarşılaşma İtaliya millisinin qələbəsi ilə başa çatmışdı.
Mənbə: Marca
