Vinfrid ŞEFER: Çempionatın liderləri bizim gücümüzü görməyə hazırlaşsın

"Şuşa" ilə yoldaşlıq oyunu keçirərək, meydana əvəzediciləri buraxdınız. Bu nə ilə bağlıdır?

Ehtiyatda qalanları yoxlamaq istəyirdim. Həmçinin ikinci komandada oynayan gəncləri də meydana buraxdım. İkinci qolu Nurlan vurdu. Onun yaxşı göstəriciləri var. Lakin bu oyun onun gələcəyi baxımından o qədər də əhəmiyyətli deyil. Bu futbolçunu izləməkdə davam edəcəm.

 

Azərbaycan çempionatının son turunda komandanız "Gəncə"-ni məğlub etdi. Qarşıda "Qarabağ"-la oyun var. Ağdamlılar daha təhlükəli rəqibdir?

Açığı deyim ki, "Qarabağ"-dan çox xoşum gəlir. Orada həm yaxşı oyunçular yığışıb, həm əla məşqçi var. Yığmanın bir çox oyunçusu bu komandada çıxış edir və bir-birilərini əla başa düşür. Onlara 0:2 hesabı ilə məğlub olduğumuz oyunu yada salıram.

 

Revanş barəsində düşünürsünüz?

Xeyr. Bu cür fikirlər toparlamağa pis təsir edir. Beyin həmişə soyuq qalmalıdır.

 

Bəs qələbə qazanmaq niyyətiniz yoxdur?

Əlbətdə var. Hətta planımız da var. Amma onu sizə açıqlamayacam.

 

Planınız erkən qol vurmaqdı?

Əgər hesabı oyunun əvvəlində aça bilsək, o zaman təşəbbüsü ələ keçirə bilərik. Gərək müdafiədə diqqətli oynayaq və üç xal toplaya bilək.

 

Vaqif Cavadov bu dəfəki görüşü də buraxacaq?

O zədəli idi, buna görə də Gəncədə çıxış etmədi. Hələ Türkiyə ilə oyunda kiçik zədə almışdı. Vəziyyəti çətinləşdirmək istəmirdik. Hal hazırda o həkimlərin müşahidəsi altındadır. Çox ümid edirəm ki, "Qarabağ"-la oyunda Vaqif bizə kömək edəcəm.

 

Bəxtiyar Sultanovu əvəzediclər komandasına göndərdiniz. Hesab etmirsiniz ki, Lenadro Roşa ilə baş verən insident nizam-intizamın olmamasının əlamətidi?

Əksinə. O kodeksi pozdu və indi cəzasını çəkir. Elə intizam budur. Bu cür insident kütləvi xarakter daşımır.

 

Legionerlərin əksəriyyəti ümidləri doğrultmur – siz bununla razısınızmı?

Onların əksəriyyətini böyük ümidlərlə aldıq. Komandaya uğur əldə etməkdə kömək etməliydilər. Buna görə mən də bu cür vəziyyətdən razı deyiləm. Düşünürəm ki, hələ vaxt var və ilin sonuna qədər onlar özünü göstərə biləcək.

 

Bəs göstərə bilməsələr, o zaman onlarla ayrılmaq qərarını verəcəksiniz?

Yanvara qədər vaxt var. Onların gələcəyi ilə bağlı dərhal qərar vermək istəmirəm.

 

"Bakı"-nın turnir cədvəlindəki vəziyyəti sizi əsəbləşdirmir?

Əlbətdə. Axı biz bundan yaxşısına layiqik. Lakin meydanda oyun yoxdursa, xal haqqında danışmaq nəyə lazımdır? Amma mən ümid edirəm ki, "Gəncə" üzərində qələbə uşaqlara müsbət təsir edəcək.

 

Sizcə "Bakı" ilk "altılığ"dan kənarda qala bilər?

Bu barədə heş düşünmürəm. Hətta biz çempion olmaq şansını da itirməmişik. Buna görə də qabaqcadan nəticə çıxartmayın. "Bakı" hələ öz formasını yığır. Çempionatın liderləri bizim gücümüzü görməyə hazırlaşsın.