12 noyabr 2010 22:26
`Komandam axıradək əzmkarlıq göstərərək 1 xal qazandı`
“Biz bu oyuna ciddi hazırlaşırdıq. Artıq neçə oyun idi ki, böyük hesabla məğlub olurduq. Ona görə də məqsədimiz bu oyunda heç olmasa 1 xal qazanmaq idi”. Azerisport.az xəbər verir ki, bu sözləri MOİK-in baş məşqçisi Ramil Əliyev söyləyib.
Bu gün Premyer Liqanın 13-cü turu çərçivəsində sensasiyalı şəkildə AZAL-dan xal alan hərbçilərin çalışdırıcısı oyundan sonrakı mətbuat konfransında daha sonra bunları vurğulayıb:
“İlk buraxdığımız qola kimi əks-hücümda 2-3 qol epizodumuz oldu. Təəssüf ki, bunlardan istifadə edə bilmədik, təcrübəsizlik bizə mane oldu. İkinci hissədə 11 metirlik cərimə zəribəsindən qol vurduq. Qapıçımız qırmızı vərəqə alaraq komandanı pis vəziyyətdə qoydu. Son 25 dəqiqə bəlkə də baxımsız alındı. Bunun da səbəbi bizim 10 nəfər qalmağımız və AZAL komandasının səviyyəcə bizdən üstün olması idi. Komandam axıradək əzmkarlıq göstərərək 1 xal qazandı".
