13 noyabr 2010 19:49
Şükürov Diniyevin komandası üzərindəki qələbəyə sevindi (YENİLƏNİB)
Bu gün Rusiya Premyer Liqasında 28-ci turun oyunları keçirilib. Azerisport.az xəbər verir ki, hesabat turunda milimizin sabiq çalışdırıcısı Şahin Diniyevin çalışdığı Terek`lə yığmamızın üzvü Mahir Şükürovun çıxış etdiyi Anji üz-üzə gəlib. Qroznıda baş tutan qarşılaşma Bakı vaxtı ilə saat 17.45-də start götürüb.
Son iki oyunu səhhətindəki problemlərə görə buraxan Mahir Şükürov bu oyunda da iştirak etməyib. Ehtiyatda qalan futbolçumuzun matçın gedişində mübarizəyə qoşulması gözlənilsə də, bu, baş verməyib.
Matça gəlincə, 13-cü dəqiqədə Sadayev Diniyevin komandasını hesabda önə keçirsə də, bundan cəmi 3 dəqiqə sonra Qolenda hesabda tarazlığı bərpa edib. Terek matçın 39-cu dəqiqəsində azlıqda qalıb. Kobenko ikinci sarı vərəqə alaraq, meydandan qovulub. 62-ci dəqiqədə Josan meydana çıxan kimi dərhal komandasını hesabda önə keçirb. 65-ci dəqiqədə isə Çorayev Anji`nin növbəti qolunun müəllifi olmaqla yanaşı, yekun nəticəni müəyyənləşdirib - 3:1. Nəticədə Şükürov Diniyevin komandası üzərində qələbəyə sevinib.
Qeyd edək ki, hazırda 27 oyundan 32 xal toplayan Terek turnir cədvəlində 9-cu, 30 xalı olan Anji isə 11-ci pillədə qərarlaşıb.
