13 noyabr 2010 14:12
Azərbaycan yığmasının rəqibindən Türkiyəyə sərt etiraz
Millimizlə birgə AÇ-2012-nin seçmə mərhələsi çərçivəsində eyni qrupda yer alan Almaniya və Türkiyənin gənc oyunçuları milliləşdirmək üstündəki mübarizəsi gündən-günə daha da gərginləşir. Azerisport.az xəbər verir ki, Türkiyə Futbol Federasiyasının Nurnberg-də forma geyən Mehmet Ekicinin ardınca, Almaniyada top qovan digər oyunçuları da milliyə cəlb etmək üçün işə başlaması baş məşqçi Yoahim Löv də daxil olmaqla, hər kəsi ayağa qaldırıb.
Bild`in yazdığına görə, bundestimin çalışdırıcısı hətta türklərin bu yolda oyunçulara təzyiq göstərdiyini də iddia edib. `Löv, Türkiyənin siyasətinə qarşı mübarizə aparır” başlıqlı xəbərdə bildirilir ki, almaniyalı mütəxəssis bu mənada hazırda daha çox gündəmdə olan Ömər Toprak ilə görüşüb, ona Almaniya millisini seçmək təklifini irəli sürəcək.
“Bu oyunçuyla görüşəcəm və Almaniya millisinin perspektivlərini göstərməyə çalışacam. TFF-nin Almaniyada yaşayan gənc oyunçuların bəzən böyük təzyiqlə izində olduqlarını bilirik. Ancaq biz böyük təzyiq göstərməyəcəyik. Ancaq onlarla açıq və dürüst bir şəkildə danışacağıq”.
