18 noyabr 2010 11:38
Hiddink Türkiyədə az vaxt keçirməsinin sirrini açıqladı
AÇ-2012-nin seçmə mərhələsində millimizin rəqiblərindən olan Türkiyə yığmasının hollandiyalı baş məşqçisi Qus Hiddink qardaş ölkədə az vaxt keçirməsinə görə ciddi tənqid olunurdu. Azerisport.az xəbər verir ki, çoxları bunun sadəcə onun həvəssiz çalışmasından irəli gəldiyini düşünsə də, hollandiyalı mütəxəssis əsl sirrin üstünü açıb.
Belə ki, dünən keçirilən Hollandiya ilə Amsterdamdakı yoldaşlıq oyunundan sonra “ay-ulduzlular”ın çalışdırıcısı bunu belə izah edib: “Hər kəs Türkiyədə niyə olmadığımı soruşurdu. Bir həftə gəlirdim, bir həftə olmurdum. Bunun tək səbəbi, Türkiyə xaricindəki oyunçuları izləməyim idi. Gəncləşdirmə siyasətinə gedəcəyimi demişdim. Bunu gerçəkləşdirmək üçün qısa bir zamanımız vardı. Belə qısa bir zamanda komandaları izləyib, oyunçuları üzə çıxarmağımız vacib idi”.
“Bunları qazanmamış olsaydıq, bəlkə də bu oyunçular indi başqa ölkələrdə oynayırdılar. Təkcə böyük klublardan yox Avropada uğur qazana bilməyən kiçik klublardakı oyunçulara da diqqət yetirirdik. Komandaya dəvət etdiyimiz gənclərin ümidləri doğrultmasına çox sevindim. Gələcəkdə onlarla daha böyük uğurlar qazanacağımıza inanıram” – deyə Hiddink əlavə edib.
