19 noyabr 2010 15:54
Zaur Həşimov: Həmin qoldan sonra çempionatda fərqlənə bilmirəm
Qarabağ Premyer Liqanın 14-cü turu çərçivəsində 2 gün sonra AZAL-la qarşılaşacaq. Azerisport.az xəbər verir ki, cari mövsümə uğurla başlayan təyyarəçilərlə görüşdə Ağdam təmsilçisi üçün heç də asan keçməyəcək. Qurban Qurbanovun komandası 2007-ci ildən məğlub olmadığı rəqibini məğlub etməklə xal fərqini minimum endirmək istəyir.
Qarabağ - AZAL qarşıdurmasında heç şübhəsiz ən yadda qalan məqam 2007/08 mövsümünün sonuncu turuyla bağlıdı. O vaxt `Olimpik` adlanan komandaya Qarabağ`dan bir xalın alınması çempionluq üçün kifayət edirdi. Amma komandamızdan Zaur Həşimovun 85-ci dəqiqədə vurduğu qol `Olimpik`in tarixində ilk dəfə qızıl medallara sahib çıxmasını əngəllədi.
Hazırda da ağdamlıların düşərgəsində yer alan Zaur AZAL-la oyun ərəfəsində klubun rəsmi saytına maraqlı açıqlama verib: “AZAL-la qarşılaşmaya adi oyunlar kimi hazırlışarıq. Amma qələbə bizim üçün daha vacibdi. AZAL cari mövsüm olduqca uğurlu çıxış edir. 2007/08 mövsümündə vurduğum qola gəlincə, o, çox baxımlı alınmışdı. Ancaq həmin qoldan sonra çempionatda fərqlənə bilmirəm. Düzdü, o vaxtlar yarımmüdafiədə çıxış edirdim, qola daha yaxın olurdum. İndi sadəcə künc zərbəsi zamanı qol vurmaq imkanım olur. Amma komandanın qələbəsi üçün heç də mənim qol vurmağım vacib deyil. İnşallah, sabah qələbə qazanarıq. Təbii ki, qol vurmaq imkanım olsa buna çox sevinərəm”.
