19 noyabr 2010 16:09
Arif Əsədov: Yeganə məqsədimiz zirvədəki mövqeyimizi möhkəmlətməkdir
Neftçi`nin baş məşqçisi Arif Əsədov klubun rəsmi saytına müsahibə verib. Azerisport.az xəbər verir ki, paytaxt klubunun çalışdırıcısı Qəbələ ilə Premyer Liqanın növbəti turundakı çətin oyuna hazırlıqlar barədə bunları söyləyib:
“Qəbələ Premyer Liqada güclü komandalardan biridir. Ötən mövsüm bizim üçün ən arzuolunmaz rəqiblərdən biri idi. Əlbəttə hər bir komanda meydanı qalib kimi tərk etmək istəyir. Qəbələ “altılığ”a düşməyə iddialı klublardandır. Düşünürəm ki, digər komandalar kimi Qəbələ də bizə qarşı var gücü ilə oynayacaq”.
Qəbələ`nin Neftçi üçün heç də düşərli rəqiblərdən olmadığını vurğulayan Əsədov bu matç ərəfəsindəki problemlərindən də danışıb: “Komandamızda Qəbələ sindromu var idi və bu sindromu biz 1-ci dövrədə Qəbələdə qıra bildik və bu dəfə də çalışacağıq ki, qələbə qazanaq. Komandaya gəldikdə isə zədəli futbolçularımız var, bunlar Rail Məlikov, Paulius Qribauskas və Flavinyodur, kollektivdə əhval-ruhiyyədə yüksək səviyyədədir. Yeganə məqsədimiz 3 xal qazanmaq və turnir cədvəlinin zirvəsində mövqeyimizi bir qədərdə möhkəmlətməkdir”.
