21 noyabr 2010 14:23
Ernad Skuliç: Bakı`nın hədəfləri tam fərqlidir
Bakı`nın dayaq yarımmüdafiəçisi Ernad Skuliç Premeyr Liqanın 14-cü turu çərçivəsində MOİK üzərində qazandıqları 4:0 hesablı qələbədən sonra azerisport.az-ın suallarını cavablandırıb.
- MOİK üzərində gözlənilən qələbə qazandınız...
- Böyükhesabı qələbə qazanmağımıza baxmayaraq, matç çox ağır keçdi. Xüsusilə birinci hissə çətin alındı. Çoxdan idi belə stadionda oynamırdıq deyə, indi belə qazona alışmaq çox çətindir. Meydança çox vəziyyətdə idi. Ancaq ikinci hissədə istədiyimizi reallaşdıra bildik. Standart vəziyyətlər köməyimizə çatdı.
- Və sizin qollarınız...
- Mən hər oyunda irəli gedirəm. Buna görə də hər dəfə qol vəziyyətlərim olur. Ancaq hər dəfə qol vurmaq olmur.
- Siz adətən başla qollar vurursunuz və bu oyunda da oxşar vəziyyətlərdən alındı...
- Məndə demək olar ki, elə həmişə belə vəziyyətlər olduğu üçün başla qollar vururam.
- Bu mövsüm neçənci qolunuz idi?
- Bu oyundakı qollarla üçüncü oldu. Buna görə sevincliyəm. Nə qədər çox vursam, komandam üçün də yaxşıdı. Yeri gəlmişkən, mən indiyə kimi karyeramda dubl etsəm də, Azərbaycan karyeramda ilk dəfə buna nail oldum.
- İlk hissədə niyə heç nə alınmırdı?
- MOİK ancaq müdafiədən oyun qururdu. Buna görə də onlar heç nə edə bilmədilər. Əvəzində biz hücum etsək də, onlar da komanda şəklində müdafiə olunmağa üstünlük verirdilər. Ancaq qollar vurulduqca müdafiə yarılmağa başladı. Nəticədə biz 4 qol vura bildik. Bizim üçün əsas olan qələbə qazanmaq idi. Bizim nə vaxt və neçə qol vurmağımız artıq elə də əhəmiyyət daşımır.
- Bakı yenidən “altılığ”a qayıtdı. Bunu necə qiymətləndirirsən?
- Elə bilirsiz ki, buna görə sevinirik? Bakı bundan razı deyil. Bizim hədəflərimiz tam başqadır. Biz çempionluq və avrokuboklarda çıxış etmək uğrunda mübarizə aparırıq.
- Belə başlanğıcdan sonra bu, mümkündürmü?
- Əlbəttə, mümkündür. Bundan sonra hər şey öz əlimizdədir. Əgər qələbələrimizi sıralamağa başlasaq, hər şey qaydasına düşəcək. Biz artıq 3 oyundur ardıcıl qələbə qazanırıq. Belə seriya bizdə bu mövsüm hələ olmamışdı.
- Növbəti turda sizi Xəzər Lənkəran`la oyun gözləyir...
- Xəzər Lənkəran`la qarşılaşma çox çətin keçəcək. Bəli biz son vaxtlar onlar üzərində qələbə qazanırıq. Ancaq qarşıdakı oyun ərəfəsində bu bizim üçün heç nə demir.
