21 noyabr 2010 20:22
Rəşad Sadıqovun komandası Superliqanın liderindən səfərdə xal aldı
Bu gün Türkiyə Superliqasının 13-cü turunun növbəti oyunları keçirilib. Azerisport.az xəbər verir ki, millimizin kapitanı Rəşad Sadıqovun şərəfini qorudu Eskişehirspor səfərdə Superliqanın lideri Trabzonspor`la qarşılaşıb.
Bir sıra aparıcı futbolçuları ilə yanaşı, əsas heyət oyunçularından sayılan Rəşad Sadıqovu da Trabzona aparmayan baş məşqçi Bülənt Uyğunun özünün də cəzalı olması bu komandanın liderdən xal alacağına ümid yeri qoymurdu. Çünki son turlarda sərgilədiyi oyunla liderliyə yüksələn, ötən tur son çempion Bursaspor`a səfərdə 2:0 qalib gələn trabzonluların doğma meydanda xal itirəcəyinə heç kim inanmırdı.
Lakin Rəşadın zədə ucbatından forma geymədiyi qarşılaşmada oyundaşları çətin səfər matçından qolsuz heç-heçəylə ayrılmağı bacarıblar. Qazanılan 1 xal sayəsində xallarının sayını 12-yə çatdıran eskişehirlilər hazırda 14-cü pillədə qərarlaşıblar.
