24 noyabr 2010 18:47
Real`ın oyunçuları qırmızı vərəqəni Mourinyonun istəyi ilə alıb?
Dünən gecə Çempionlar Liqasının qrup mərhələsinin 5-ci turu çərçivəsində Hollandiyanın Ajax və İspaniyanın Madrid şəhərinin təmsilçisi Real arasında keçirilən qarşılaşmada hamını təəccübləndirən olaylar yaşandı. Azerisport.az xəbər verir ki, artıq matçın başa çatmasına 2-3 dəqiqə qalmış İspaniya klubunun 2 futbolçusu - Sergio Ramos və Xabi Alonso bilərəkdən ikinci sarı vərəqəni alaraq meydandan qovuldu.
Bütün dünya onların göz görə-görə bilərəkdən qırmızı vərəqə almasının səbəbini araşdırarkən İspaniya mətbuatı məsələylə bağlı maraqlı bir iddia irəli sürüb. Onların iddiasına görə, futbolçular baş məşqçi Joze Mourinyonun təlimatına əsasına, bilərəkdən belə addım atıblar. Məsələ burasındadır ki, birinci yeri tutaraq 1/16 final mərhələsinə vəsiqə qazanan Real`ın qrupdakı son oyunu əhəmiyyətini itirdiyindən portuqaliyalı mütəxəssis əvvəlki matçlardan sarı vərəqələri olan Ramosla Alonsoya dünənki matçda qırmızı vərəqə almağı tapşırıb. Nəticədə hər iki futbolçu qrupdakı son oyunu avtomatik olaraq buraxacaq və 1/16 finala təmiz çıxacaqlar.
