26 noyabr 2010 18:28
Millimizin rəqiblərinin oyunçu savaşı son mərhələdə
AÇ-2012-nin seçmə mərhələsi çərçivəsində millimizin rəqiblərindən olan Türkiyə və Almaniya yığmaları bir futbolçu uğrunda gərgin mübarizəyə girişib. Azerisport.az xəbər verir ki, qardaş ölkə millisinin çalışdırıcısı köməkçisi Oğuz Çetinlə birgə Almanyanın Hannover şəhərinə yollanıb.
Onların bu səfərində məqsəd kimi Hannover – Freiburg matçını izləmək göstərilir. Lakin artıq hər kəs bilir ki, hollandiyalı mütəxəssislə köməkçisinin bu oyuna gəlməkdə əsas məqsədi Freiburg’da forma geyən Ömer Toprak adlı oyunçunun çıxışını izləmək və onunla yaxından görüşüb, söhbətləşməkdir.
Qeyd edək ki, bu oyunçu keçmişdə Almaniyanın gənclərdən ibarət millisində çıxış etsə də, ağır zədə aldıqdan sonra diqqətdən kənarda qalıb. Lakin hazırda yenidən parlaq oyun sərgiləməyə başlaması Avropada türk oyunçuları milliləşdirməklə məşğul olan Türkiyə millisinin rəhbərliyini fəaliyyətə keçməyə məcbur edib.
Lakin türklərin bu siyasətinə bir müddət öncə etirazını dilə gətirən Almaniya millisinin baş məşqçisi Yoahim Löv də açıqlama verərək, bu futbolçuyla danışıqlar aparacağını və Almaniya yığmasına dəvət edəcəyini bildirmişdi. İndi Ömerin bu iki ölkədən hansına üstünlük verəcəyi maraqla gözlənilir.
