26 noyabr 2010 18:46
Neftçi rəsmiləri Türkiyəyə getdi
Neftçi PFK-nın icraçı direktoru Mübariz Xudiyev və məşqçi-seleksiyaçı Bəxtiyar Musayev Türkiyəyə ezam olunublar. Azerisport.az xəbər verir ki, buna səbəb komandanın yanvarda Türkiyənin Antalya şəhərində keçəcəyi təlim-məşq toplanışı üçün məkan seçilməsidir. Bu haqda Mətbuat və İctimaiyyətlə Əlaqələr Departamentinin rəisi Elnur Əşrəfoğlu məlumat verib. Onun sözlərinə görə, Neftçi`nin nümayəndələri artıq Antalyada bəzi yerlərlə tanış olublar.
“Neftçi gələn ilin oyunlarına 3 mərhələdə hazırlaşacaq. Futbolçular əvvəlcə yanvarın 7-8-də Bakıda tibbi baxışdan keçəcəklər. Bundan sonra komanda üzvləri Türkiyənin Antalya şəhərində təlim-məşq toplanışında olacaqlar. İlk mərhələ ayın 10-dan 20-dək olacaq. Həmin arada Neftçi bir yoldaşlıq oyunu keçirməyi planlaşdırır. Görüşün yanvarın 19-da Rusiyanın Rubin klubunun ikinci komandası ilə keçirilməsi nəzərdə tutulub. Yanvarın 24-dən fevralın 4-dək yenə də Antalyada baş tutacaq ikinci mərhələdə isə üç yoldaşlıq oyunu keçirmək niyyətindəyik. Bunlardan birinin yanvarın 29-da Şturm`la baş tutacağı gözlənilir. Artıq Avstriya klubundan müsbət cavab da daxil olub. Bununla belə, rəqiblərin dəyişdirilməsi ehtimalı da var” - deyə Elnur Əşrəfoğlu bildirib.
