26 noyabr 2010 11:07
Rəşad Sadıqovun komandası bu gün Manisaspor`la qarşılaşacaq
Milli komandamızın kapitanı Rəşad Sadıqovun top qovduğu Eskişehirspor bu gün Türkiyənin Superliqasının 14-cü turu çərçivəsində növbəti oyununa çıxacaq. Azerisport.az xəbər verir ki, hesabat turununun açılışını etmiş olacaq eskişehirlilərin heyətində millimizin müdafiəçimizin bu dəfə də forma geyməsi inandırıcı görünmür.
Hələ Fenerbahçe ilə qarşılaşmada sıradan çıxan Rəşad son oyunları buraxmaq məcburiyyətində qaldı. Yalnız bu həftənin əvvəlindən hazırlıqlara start verən Sadıqov özü də bildirir ki, Manisa ilə oyuna tam hazır deyil və güman ki, forma geyə bilməyəcək.
Baş məşqçi Bülənt Uyğunun rəhbərliyi altında dünən son məşqinə çıxan Rəşad və oyundaşları daha çox taktiki hazırlıqlar üzərində işləyiblər. Həmin son çalışmada həmyerlimiz də oyundaşlarıyla birgə məşq edib. Məhz bu hazırlıq prosesindən sonra komanda üzvləri klubun bazasında matç saatını gözləməyə başlayıblar.
Baş məşqçi isə son məşqin ardından inamlı açıqlama verib: “Komanda olaraq yaxşı durumdayıq. Manisaspor`la oyuna artıq çox qısa zaman qaldı. Meydandan 3 xalla ayrılacağımızı düşünürəm. Bunu bacaracaq yaxşı heyətimiz var”.
Qeyd edək ki, Bakı vaxtı ilə 22:00-da başlayacaq Eskişehirspor – Manisaspor matçı ərəfəsində Rəşadın komandası 12 xalla 14-cü, rəqibləri isə 15 xalla 12-ci sıradadır.
