27 noyabr 2010 01:27
Rəşad Sadıqovun komandasından əzmkar qələbə
Millimizin kapitanı Rəşad Sadıqovun top qovduğu Türkiyənin Eskişehispor klubu Superliqada növbəti oyununa çıxıb. Azerisport.az xəbər verir ki, baş məşqçisi Bülənt Uyğunun cəza səbəbindən rəhbərlik edə bilmədiyi yetirmələri doğma meydanda Manisaspor`la qarşılaşıblar.
Öncədən də məlum olduğu kimi, millimizin müdafiəçisi son oyunlarda olduğu kimi bu görüşdə də zədə ucbatından forma geyə bilməyib. Sadıqovun iştirak etmədiyi qarşılaşmalarda qapısını toxunulmaz saxlamaqda çətinlik çəkən eskişəhirlilər bu dəfə də rəqibinin fərqlənməsinə mane ola bilməyib. Ancaq birinci hissədə hesabda geri düşən meydan sahibləri fasilədən sonra nəinki hesabı bərabərləşdirməyə, hətta əzmkar qələbə qazanmağa da nail olublar. Qonaqların heyətində fərqlənən Mehmet Güvənin (18-ci dəqiqə) qollarına öncə Burhan Əsər (74) ardınca isə Batuhan Karadəniz (87) cavab verib.
Bu qələbə sayəsində turnir cədvəlində bir neçə pillə irəliləyən həmyerlimizin komandası Manisaspor`u da qabaqlayaraq, 15 xalla 12-ci yerdə qərarlaşıb.
