27 noyabr 2010 14:12
Tahir Gözəl Qarabağ - Neftçi duelini Türkiyə derbisiylə müqayisə etdi
Daim Qarabağ`a verdiyi mənəvi dəstəklə özündən söz etdirən Ağdam klubunun vitse-prezidenti Tahir Gözəl yenə ənənəsinə sadiq qalıb. Azerisport.az xəbər verir ki, sabah keçiriləcək Neftçi ilə oyun ərəfəsində o, yenidən komandanın düşərgəsində olmağı lazım bilib.
Son zamanlar bir qədər uğursuz çıxış edən futbolçularla görüşdə Tahir Gözəl sözlərinə belə başlayıb: “Bu gün sizinlə futbol haqqında danşmayacam. Hər dəfə futboldan danışırıq. Amma futbol heç də həyatımızın tək oyunu deyil”.
Çox səmimi ab-havada keçən söhbətdə vitse-prezident nə qədər futbolla bağlı danışmayacağını bildirsə də, onu da bildirib ki, Qarabağ - Neftçi dueli hər zaman onu həyəcanlandırır: “Türkiyədə mənim üçün bir matç var: Galatasaray - Fenerbahçe. Galatasaray - Trabzonspor və ya Fenerbahçe - Beşiktaş oyunu Galatasaray - Fenerbahçe duelini əvəz edə bilməz. Mənim üçün sadəcə Qarabağ - Neftçi dueli Galatasaray – Fenerbahçe oyunudur".
