29 noyabr 2010 14:07
Georgiyevski Azərbaycan futbolunun gələcəyindən danışdı
Neftçi`nin yarımmüdafiəçisi Slavko Georgiyevski Qarabağ`la oyun haqda fikirlərini açıqlayıb. Azerisport.az xəbər verir ki, klubun rəsmi saytına danışan makedoniyalı futbolçu bunları vurğulayıb:
“Əvvəlcə onu qeyd etməliyəm ki, liderliyimizi sürdürdüyümüz üçün çox sevinirəm. Qarabağ`ı Azərbaycan Premyer Liqasının ən güclü komandalarından biri hesab edirəm. Bizimlə oyunda hər kəs bir daha bunun şahidi oldu. Rəqiblə görüş çətin və gərgin keçdi. Qalib gəlməyi bacardıq. Bir şeyi nəzərə almaq lazımdır ki, Qarabağ`la oyunda Azərbaycan futbolu qazandı. Çünki rəqibimizlə yanaşı, bizim heyətimizdə də bir çox gənc futbolçular yer alırdı”.
“Düşünürəm ki, belə vacib görüşlərdə çempionluğa iddialı komandada gənc futbolçuların çıxış etməsi vacib faktlardan biridir. Mirhüseyn Seyidov, Amit Quluzadə, Araz Abdullayev, Cavid Hüseynov, Cavid İmamverdiyev - bu gənclər Azərbaycan futbolunun gələcəyidir. Baş məşqçimiz onlara şans verməklə yığmanız üçün böyük işlər görür” – deyə makedoniyalı futbolçu bildirib.
