29 noyabr 2010 16:14
Xaqani Məmmədov XL və Qarabağ`ın ittihamlarına cavab verdi
AFFA Hakimlər Komitəsinin sədri Xaqani Məmmədov Azərbaycan Premyer Liqasının son turunun Qarabağ - Neftçi və Bakı - Xəzər Lənkəran oyunlarındakı mübahisəli məqamlara dair fikrini bildirib. Azerisport.az-a verdiyi müsahibəsində Məmmədov bunları söyləyib:
“İstənilən hakim kiçik xətalar və səhvlər edir. Amma bu oyunlarda dəhşətli heç nə yox idi. Klub təmsilçiləri hakimləri güya iki penaltiyə görə günahlandırır. Hər iki görüşdən sonra mən diqqətlə mübahisəli məqamlara baxdım və hakimlərin heç bir dəhşətli səhvini görmədim. Əgər klub təmsilçiləri haqlı olduqlarını hesab edirlərsə, onda AFFA-ya gəlsinlər və biz birlikdə bütün mübahisəli məqamları izləyərik”
“Mənə başqa məqam maraqlıdı. Əgər hakim səhv edirsə, o dərhal onu işindən uzaqlaşdırmağı tələb edirlər. Ancaq oyunçu iki qol vəziyyətini reallaşdırmayanda niyə klub onu komandadan qovmağı tələb etmir” - deyə Xaqani Məmmədov qeyd edib.
Maraq üçün bildirək ki, HK sədri sözügedən oyunçunun adını çəkməsə də, aydındı ki, o, ilk hissədə az qala Neftçi`ni kədərləndirməyə yaxın olan Qarabağ`lı Elvin Məmmədovu nəzərdə tutur.
