30 noyabr 2010 17:22
Uinston Parks: PFL həlledici oyunlara xarici hakimləri cəlb etsin
Xəzər Lənkəran`ın hücumçusu Uinston Parks azerisport.az-a müsahibəsində Azərbaycan çempionatının 15-ci turunda Bakı ilə oyun (1:1), hakimlik və öz qolları haqda danışıb.
- Bakı ilə son oyunu sizin komandanın hesabına yazmaq olar?
- Nəzərə alsaq ki, biz səfərdə oynayırdıq, onda heç də pis nəticə deyil. Heyf ki, hesabı açsaq da, üstünlüyümüzü qoruya bilmədik. Hər halda xal yığmağa davam etməyimiz sevindirir.
- Xəzər Lənkəran öz qələbəsini ikinci hissədə əldən verdi. Siz özünüz geri çəkildiniz ya rəqib buna vadar etdi?
- Bizim belə planımız yox idi. Rəqibin bizi öz qapımıza sıxması normal haldır. Axı onlar evdə və qələbəyə oynayırdılar. Bakı`nın güclü hücum xətti var. Zədə səbəbi ilə bir neçə oyunçumuzun yoxluğu oyunumuza təsir göstərdi.
- Yeri gəlmişkən, oyunda fərqlənə bildiniz. Bu mövsümdə məhsuldarlığınızdan razısınız?
- Yox. 15 oyunda 5 qol məni qane edəcək məhsuldarlıq deyil. Bəzi oyunçuların yoxluğu məni meydanda başqa öhdəliklər yerinə yetirməyə məcbur edir ki, bu da məni rəqib qapısından uzaq salır. Belə vəziyyətdə qollar ikinci plana keçir.
- Çoxları hakimlikdən narazı qaldı.
- Bu haqda nəinki bizim komandaya yaxın insanlar, çoxları danışır. Ölkənin bütün futbol ictimaiyyəti bu haqda danışır. Bu, biabırçılıqdır. Biz həftə boyunca işləyirik ki, bunu hakimlər korlasın? Onlar futbolu nə ilə isə dəyişik salırlar. Mən sadəcə buna izah tapa bilmirəm. Hesab edirəm ki, hakimlik mövzusu Azərbaycan futbolunda ən mühüm məsələdir.
- Qorxmursunuz ki həlledici məqamda hakim səhvləri təkrarlansın?
- Mən məhz bundan qorxuram. Belə hakimlərlə bu, mümkündür. Onda mövsüm boşuna keçəcək. Qoy PFL həlledici oyunlara xarici hakimləri cəlb etsin.
- Bakı ilə oyunun qənaətbəxş nəticəsindən danışırsınız. Ancaq əsas rəqibiniz Neftçi Qarabağ`ı minimal hesabla məğlub edərək sizdən üç xal uzaqlaşdı.
- Bu, 15-ci turdakı heç-heçənin mənfi tərəfidir. Qorxulu heç nə yoxdur. Bizim hələ Neftçi ilə oyunumuz var. Lənkəranda qələbə qazandıq, Bakıda da bunu edə bilərik. Kimin güclü olduğunu biz hələ göstərəcəyik. Digər tərəfdən, onların Qarabağ`la oyununu görmüşəm və müşahidələrimə görə hakim iki dəfə bakılıların qapısına penalti təyin etmədi.
- Qarşıda turnir cədvəlinin ikinci altılığında yerləşən komandalarla üç oyun var - Turan, Gəncə və MOİK ilə...
- Belə oyunlarda xallar qazanmaq lazımdır. Üç oyun bizim üçün çox vacibdir. Qələbəni heç kim bizə mübarizəsiz verməyəcək və buna görə də mübarizə aparmaq lazımdır.
