1 dekabr 2010 17:53
Qarabağ Suraxanıda ilk məşqinə çıxdı, zədəliləri sevindirdi
Qarabağ Premyer Liqanın növbəti turunda qarşılaşacağı İnter`lə oyunun hazırlıqlarını davam etdirir. Azerisport.az xəbər verir ki, dekabrın 4-ündə `bankirlər`i qəbul edəcək Ağdam təmsilçisi bu gün ilk olaraq trenajor zalında çalışıb. Ardından isə komanda Suraxanı qəsəbə stadionuna yollanıb. Qurban Qurbanovun yetirmələri uzun zamandır təmirə bağlanan qəsəbə stadionunda bu gün ilk dəfə məşqə çıxıb. Hansı ki, İnter``lə oyun da məhz bu stadionda baş tutacaq.
Qarabağ`ın zədəlilərinin sıraya dönməsi də məşqçilər korpusunu sevindirməyə bilməz. Ötən tur Emin İmaməliyev meydana çıxıb, Maksim Medvedev ehtiyatda qaldısa, gənc müdafiəçi İnter`lə oyunda tam sağlam vəziyyətdə olacaq. Digər zədəlilər Samir Abasov və Andrey Rubinsin də artıq komandayla məşqlərə başlaması hər kəsi sevindirir. Hal-hazırda komandadan ayrı məşq edən sadəcə Əfran İsmayılov və Ayxan Abbasovdur. Onların da gələn həftədən etibarən qrup çalışmalarına qoşulacağı gözlənilir.
