1 dekabr 2010 09:42
Mahir Şükürov üçün Anji`nin “ən yaxşı”sı seçilmək şansı
Rusiyanın Anji klubunun rəsmi saytı Rusiya Premyer Liqasında başa çatan son mövsümdə komandanın ən yaxşı futbolçusunu müəyyənləşdirmək üçün sorğu keçirir. Azerisport.az xəbər verir ki, Mahaçqala klubunun 23 futbolçusunun yer aldığı sorğuda millimizin müdafiəçisi Mahir Şükürovun da adı var. Yenicə start götürən səsvermənin nə vaxt başa çatacağı dəqiq bilinmir. Amma hər halda azərbaycanlı futbolsevərlər sözügedən klubun rəsmi saytına daxil olmaqla, Şükürovun “ən yaxşı” seçilməsinə töhfə verə bilərlər.
Maraq üçün qeyd edək ki, millimizin müdafiəçisi geridə qalan Rusiya birinciliyi çərçivəsində Anji`nin heyətində 20 oyun keçirib. Bütün qarşılaşmaları start heyətində keçirən futbolçumuz bütövlükdə 1558 dəqiqə meydanda olub. O, 3 dəfə məhsuldar ötürməylə yadda qaldığı halda, 2 dəfə sarı, 1 dəfə qırmızı vərəqəylə cəzalandırılıb. Mahirin iştirakıyla baş tutan qarşılaşmaların 5-də qələbə qazanıb, bir o qədərində də heç-heçəyə razılaşan Mahaçqala klubu qalan 10 görüşdə də məğlub olub.
