2 dekabr 2010 00:18
Baş məşqçi pasportunu itirdi, komanda 2 saat hava limanında qaldı
UEFA Avropa Liqasının 5-ci turu çərçivəsində bu gün Bolqarıstanın CSKA (Sofiya) klubu ilə qarşılaşacaq Beşiktaş səfər ərəfəsində ciddi problemlərlə üzləşib. Azerisport.az Türkiyə mətbuatına istinadən xəbər verir ki, buna İstanbul təmsilçisinin almaniyalı çalışdırıcısı Bernd Şusterin səhlənkarlığı səbəb olub.
Sofiyaya getmək üçün yola çıxan komanda üzvləri yerli vaxtla saat 16:00-da (Bakı vaxtı ilə 18:00) hava limanına yetişəndə məlum olub ki, Şuster pasportunu unudub. Baş məşqçi pasportunu komandanın bazasında unutduğunu deyincə, klub rəsmilərindən biri dərhal onu gətirmək üçün yollanıb. Lakin məlum olub ki, pasort baş məşqçinin dediyi yerdə də deyil. Nəticədə Almaniyanın Türkiyədəki səfirliyindən pasportu müvəqqəti əvəz edəcək sənəd alınıb. Məhz bundan sonra Beşiktaş`ın səfərə çıxan heyəti Bolqarıstana yola düşüb. Onların hava limanında gecikməsi isə 2 saatdan uzun çəkib.
