3 dekabr 2010 18:07
Arif Əsədov yerli futbolçuları oynatmamasına dair ittihamları cavabladı
Neftçi`nin baş məşqçisi Arif Əsədov klubun rəsmi saytına müsahibə verib. Azerisport.az xəbər verir ki, paytaxt klubunun çalışdırıcısı Fərid Quliyevi komandadan uzaqlaşdırması və digər məsələlərlə bağlı fikirlərini açıqlayıb:
“Fərid Quliyevin transferə çıxarılmasını özüm istəmişəm. Yığma komandamızın şərəfini qoruyur, gəncdir, ancaq Neftçi`də heyətə düşə bilmir. Quliyevin klubu tərk etməsi o demək deyil ki, digər oyunçularla da yollarımızı ayıracağıq. Premyer Liqa uzun bir marafondur. Mən formada olan bütün futbolçulara şans verirəm. Hazırda Neftçi`nin lider olması bizim doğru yolda olduğumuzu göstərir”.
“Mətbuatda gedən yazıları izləyirəm. Rəşad Abdullayevin, Elmar Baxşiyevin, Amit Quluzadənin, Ruslan Əmircanovun komandanı tərk edə biləcəyini yazırlar. Bu oyunçular meydanda olduqları zaman bizə çox xeyirləri dəyir. Rəşad Abdullayev bu mövsüm öz çıxışı ilə komandanın ən aparıcı futbolçularından birinə çevrilib. Hətta ölkə mətbuatı onun niyə yığmaya dəvət edilməməsi ilə bağlı Berti Foqtsa yönələn suallar ünvanlayır. Elmar Baxşiyev klubumuzun vitse-kapitanıdır, düzdür hazırda o bəzi matçlarda ehtiyatda qalır. Lakin, Elmarın ehtiyatda qalması sırf taktika ilə bağlıdır. Ruslan Əmircanov məhz Neftçi`dəki çıxışından sonra yığma komandaya dəvət alıb. Hazırda da bizim ona böyük ümidlərimiz var. Amit Quluzadəyə isə yetərincə gənc olmasına baxmayaraq, bir çox vacib matçlarda forma geyinmək şansı vermişik. Yəni komandamızın heyəti nə qədər geniş olarsa, mövsümün sonunda qızıl medalları qazanmaq şansımız daha da artmış olacaq”- deyə, Əsədov bildirib.
