4 dekabr 2010 18:46
Bəxtiyar Musayev: 10 xal fərqi ilə turnir cədvəlinə başçılıq edə bilərik, amma...
Neftçi`nin məşqçisi Bəxtiyar Musayev klubun rəsmi saytına açıqlama verib. Azerisport.az xəbər verir ki, o, son dövrlər paytaxt klubuna yönələn bir sıra ittihamları cavablayıb:
“Bu gün Neftçi`də oynayan Cavid Hüseynov, Ruslan Abışov, Cavid İmamverdiyev, Mirhüseyn Seyidov, Araz Abdullayev, Amit Quluzadə və digərləri Azərbaycan futbolunun yaxın gələcəkdə uğurlu tarixini yazmağa qadir olan futbolçulardır. Biz məşqçilər korpusu işimizdə də bu amillərə daha çox üstünlük veririk. Biz də başqa klublar kimi daha çox legioneri heyətimizə qatıb, çox sakit tərzdə oyunlarımızı keçirərək, 10 xal fərqi ilə turnir cədvəlinə başçılıq edə bilərik. Amma həqiqət budur ki, Neftçi yerli futbolçulara da üstünlük verir”.
Musayev daha sonra qazanılan uğurları əsas gətirərək, düzgün yolda olduqlarını qeyd edib: “Çox təəssüf ki, Neftçi`yə qarşı boş-boş, mənasız, cəfəngiyyat dolu fikirlər səsləndirirlər. Amma bu bir faktdır ki, Neftçi hal-hazırda hamıdan çox qol vurub, hamıdan az top buraxıb və bu uğurlar da təcrübəli legionerlərlə yanaşı, əsasən gənc futbolçuların hesabına qazanılıb. Yanlış fikirlər səsləndirənlərə isə üzümü tutub deyirəm ki, Neftçi` düzgün yoldadır və bu yoldan bizi heç kim döndərə bilməz”.
