5 dekabr 2010 18:42
“Bunu söyləyənlər Neftçi`ni və xalqını istəməyənlərdir”
Neftçi Veteranlar Klubunun rəhbəri Oqtay Abdullayev son vaxtlar Neftçi`yə qarşı olan haqsız çıxışlara və yanlış informasiyalara son qoyulmasını tələb edib. Azerisport.az xəbər verir ki, o, paytaxt klubunun rəsmi saytın açıqlamasında bu haqda aşağıdakı fikirləri səsləndirib:
“Biz Neftçi futbol klubunun veteranları doğma komandamıza qarşı yönələn əsassız ittihamları pisləyirik. Son vaxtlar bəzi kütləvi informasiya vasitələrində Neftçi haqqında boş-boş, cəfəngiyyat dolu fikirlər səsləndirilir. Bunu söyləyənlər Neftçi`ni və xalqını istəməyənlərdir. Çünki Neftçi xalqın komandasıdır və doğma Azərbaycanımızın ən köklü, adlı-sanlı klubudur”.
Abdullayev komandanın hazırkı durumunu da dəyərləndirib: “Hal-hazırda bu klubda yeni rəhbərliyin gördüyü işlər göz qabağındadır. Bu komandada əsl peşəkarlar çalışırlar. Sadıq Sadıqov Neftçi`nin prezidenti olandan sonra komandanın uğurlu çıxışı hamımızı sevindirir. Flaqman xüsusilə bu mövsümkü oyunlarda məzmunlu və hücum futbolu nümayiş etdirir. Heç təsadüfi deyil ki, hal-hazırda Neftçi Premyer Liqada həm məhsuldarlığı, həm də etibarlı müdafiəsi ilə lider komandadır. Klub rəhbərliyinin komandanı gənc mütəxəssis Arif Əsədova tapşırması və ona inanması da bizi sevindirməyə bilməz. İnanırıq ki, Araz Abdullayev, Ruslan Abışov, Mirhüseyn Seyidov, Cavid İmamverdiyev, Amit Quluzadə, Cavid Hüseynov və digər gənc futbolçular tezliklə futbolumuzun yeni-yeni şanlı tarixini yazacaqlar”.
Veteranların rəhbəri sonda bunları vurğulayıb: “Son dövrlər Neftçi`yə qarşı haqsız təzyiqlərin artması biz veteranları narahat edir. Bütün veteranlar Neftçi`nin futbolçularına oyunlarda bundan sonra da uğurlu nəticələr qazanması üçün heç bir təxribata fikir vermədən sonadək mübarizə aparmalarını tövsiyyə edir. Çünki mətbuatda gedən belə mənasız, populist məqalələri yazanlar futboldan anlayışı olmayanlar və qeyri-peşəkarlardır. Neftçi Azərbaycan futbolunun flaqmanıdır və biz veteranlar doğma komandamızı sonadək dəstəkləyəcəyik”.
