6 dekabr 2010 15:07
“Qarşıdakı oyunları rəqibin kimliyindən asılı olmayaraq, qalib başa vurmalıyıq”
Premyer Liqanın 16-cı turunun Simurq`la oyununda minimal hesablı məğlubiyyətlə üzləşən Bakı`nın və millimizin üzvü Luis Ramim azerisport.az saytının suallarını cavabladı:
- Bakı`nın Simurq`a məğlubiyyətinin səbəbini nədə görürsən?
- Təəssüf ki, sizin sualınıza mən də cavab verə bilmirəm. Komandamız bu gün özündə deyildi. Qol epizodları yaradırdıq, hücumlar edirdik, ancaq sonunu gətirə bilmirdik. Xüsusilə, ikinci hissədə biz tam şəkildə hücuma atılmışdıq. Bütün bunlara rəğmən xalsız qaldıq. Bəxt bizdən üz döndərmişdi. İstənilən halda məğlubiyyətdə günahkar biz futbolçularıq.
- Simurq və gəncləri sizi təəccübləndirdimi?
- Onlar erkən qol vurub, hesabı qorudular. Adətən belə vəziyyətlərdə təcrübəsiz komandalar sonradan qol buraxırlar. Ancaq çox ağıllı oynadılar. Bizə elə ilk hissədə qol vurmaq lazım idi. Bacarmayınca, onların da əminliyi artdı.
- Ola bilər ki, bunda keçmiş məşqçiniz Qyoko Haciyevskinin Bakı`nı yaxşı tanıması rol oynadı?
- Mən düşünmürəm ki, Haciyevski bizim komandanı öyrənmək üçün kifayət qədər vaxta malik olub. Bildiyimə görə, atasını itirdiyindən, ölkəsinə gedib və Simurq`u hazırlamağa da vaxtı olmayıb. İstənilən halda, düşünürəm ki, bizdə heç nə alınmadı. Simurq təkcə bizi xalsız qoymadı, bu əsl sensasiyadı.
- Bundan sonra Bakı`nın “altılıq”la bağlı perspektivlərini necə qiymətləndirirsən?
- Mən inamımı saxlıyıram ki, biz bu vəzifənin öhdəsindən gələ biləcəyik. Biz daim çempionluq uğrunda mübarizə aparmışıq, bundan sonra da elə olacaq. İndi ilin sonunadək baş tutacaq 3 oyunun hamısında qələbə qazanmaq məcburiyyətindəyik. 9 xal – bu yeganə çıxış yoludu. Bakı`sız “altılıq” maraqlı olmayacaq, bunu hamı bilir.
- Növbəti 3 oyunda qələbə istəsən də, qarşıda sizi Neftçi ilə oyun gözləyir...
- Bizə artıq rəqibin kim olması elə də vacib deyil. Hələ qarşıda bizi Muğan`la ölkə kubokunun oyunu da gözləyir. Bu turniri də yaddan çıxarmaq olmaz.
- Həmin Muğan ki, sizə Salyanda qalib gəlmişdi...
- Bəli. Çox istərdim ki, bu dəfə meydan normal vəziyyətdə olsun. Orda oynamaq sadəcə dözülməzdir.
