7 dekabr 2010 19:22
Mehman Allahverdiyev də Gəncə - Neftçi duelindən danışdı
Tanınmış futbol mütəxəssisi, birvaxlar Neftçi`nin heyətində oynamış, Gəncə futbol tarixində dərin izlər buraxmış Mehman Allahverdiyev ölkə kubokunun 1/8 final mərhələsinin sabah keçiriləcək Gəncə – Neftçi oyunu haqda fikirlərini bildirib. Azerisport.az xəbər verir ki, Allahverdiyev paytaxt klubunun rəsmi saytına açıqlamasında bunları söyləyib:
“Mən özüm də Neftçi`də oynamışam. Gəncə`də isə həm futbol oynamışam, həm də məşqçi işləmişəm. Bu komandalar arasındakı oyun nəinki müstəqil Azərbaycan, həmçinin keçmiş SSRİ-də də böyük maraq doğurub. Bilirsiz ki, gəncəli futbolçular Dinamo (Kirovabad) adı ilə SSRİ çempionatının güclülər dəstəsində iştirak edirdilər. Bizim şəhərdə futbolu sevən, futbolu düzgün analiz edən çoxlu sayda azarkeş var və heç təsadüfi deyil ki, bu mövsüm Gəncədə keçirilən oyunlar azarkeş baxımından Premyer Liqanın rekordunu vurub. Fikrimcə, maraqlı bir qarşılaşmanın şahidi olacağıq. Çünki Neftçi bizim sevimli komandadır və Azərbaycan futbolunun flaqmanıdır”.
