7 dekabr 2010 00:11
Rəşad yenə oynamadı, komandası Kayseridən 1 xalla döndü
Türkiyə Superliqasında 15-ci turun oyunlarına yekun vurulub. Azerisport.az xəbər verir ki, turun qapanış matçında millimizin kapitanı Rəşad Sadıqovun çıxış etdiyi Eskişehirspor səfərdə Kayserispor`la qarşılaşıb.
Bülənt Uyğunun gəlişindən bəri yalnız Fenerbahçe ilə səfər oyununda uduzan Eskişehir təmsilçisi bu dəfə də məğlubiyyətsiz oyunlar seriyasını davam etdirib. Rəşadın komandası hətta qələbəyə də yaxın olub. Görüşün 9-cu dəqiqəsində Kaya ilə hesabı açan qonaqlar 31-ci dəqiqədə Şişmanoğlunun hesabı bərabərləşdirməsinə mane ola bilməyiblər.
Fasilədən sonra Sadıqovun oyundaşları yenidən hesabda önə keçiblər. Bu dəfə Eser 69-cu dəqiqədə yenidən komandasını hesabda önə keçirib. Lakin sona 7 dəqiqə qalmış Ali Bilgin qonaqların qələbə qazanmaq arzusunun gerçəkləşməsinə mane olub. Nəticədə tərəflər hərəyə bir xalla kifayətləniblər.
Son oyunlarda zədə səbəbindən iştirak edə bilməyən Rəşad bu dəfə də forma geyə bilməyib. Komandası onun yoxluğunda daha bir xal qazanaraq, xallarının sayını 16-ya çatdırıb və hazırda 13-cü pillədə qərarlaşıb.
